Înîsîyatîfê Kurdîstanî Bipawê: Nêwazenê ma nê şerî vînê

Înîsîyatîfê Kurdîstanî Bipawê Burksel de eşkerayîya çapemenîye daye. Eşkerayîye de ame vatene ke Yewîya Ewropa û Neteweyê Yewbîyayeyî nêwazenê ke şerê dewleta tirke yê vera Başûrê Kurdîstanî bêro vînayene.

Înîsîyatîfê Kurdîstanî Bipawê (Defend Kurdîstan) paytextê Belçîka Bruksel de Klubê Çapemenî (Press Club)  kombîyayîşêk kerd.

Eşkerayîye de endamanê înîsîyatîfî  ke derheqê rewşe de qisey kerd nê vatî: '' Dewleta tirke bi dronayan serê şarê herême de zext kena ke herême ra vejîyê. Merdimê ke şinê ucayan yenê astengkerdene û sey terorîstan yenê namekerdene. Ma waşt şirê şarî vînê la destûr nêdîya. Şar rîyê bombardumanê dewleta tirke ra tengayî anceno.  Metîna de 1500  dewijî mecbur mendî ke dewanê xo vejîyê. 22 dewî ameyî qefilnayene.  Avaşîn de 16 dewî ameyî vengkerdene. Şar mecbur mend  biremo. Hinî nêeşkenê agêrê dewanê xo.

Darî yenê birnayene, daristanî yenê vêşnayene, kuwareyê mêsanê hingimênî zirar vînenî û citkaran ser o zext esto. Yew şer est û sûcê şerî yenê kerdene ke Ewropa zî pê rotişê çekan û bêvengîye hemkarê nê şerî ya. Waştişê ma oyo ke ma hêrişê îşxalî bidê vindarnayene û dîyalogê mabênê hêzanê kurdan avêr bêrê la PDKyî destûr nêda. 3 embazê ma yê ke Rojawanî ra tewrê heyetî bîyî, 10ê hezîranî ra înan ra xebere nêna girewtene. Yewîya Ewropa û Neteweyê Yewbîyayeyî rolê xo kay nêkenê. Cayê ke tede şer qewimîyeno rolê înan uca esto. Seba ke înan wezîfeyê xo nêard ca, ma sey hemwelatîyanê Ewropa înîsîyatîf na ro. Çîyo tew şerm zî bêvengîya çapamenîye ya.''