Xeylêk bajaranê Ewropa de Endamê Konseya Fermandarîye yê HPGyî Sînan Dêrsim (Dalokay Şanli) yo ke çend rojî verê cu şehadetê ci ame eşkerakerdene, bi aktîvîteyan ame vîrardene.

Bajaranê Hannover, Heilbronn û Freiburgî yê Almanya de semedê vîrardişê Sînan Dêrsimî aktîvîteyê cîya cîyayî ameyî kerdene.

Hannover de mîtîngêk ame kerdene û şexsê Sînan Dêrsimî de heme şehîdê şorişî ameyî vîrardene.  Qiseykerdişan de ame vatene ke ê do rêçê şehîdan de xoverdayîşî pîlêr bikerê.

Aktîvîteya Heilbronnî de bale ameye antene xoverdayîşê cuye yê Sînan Dêrsimî ser û ame vatene ke Kurdîstano ke gonîya şehîdan semedê ci rişîyaye do bêro azadkerdene. Aktîvîte de Qirkerdişê Armenîyan zî ame şermezarkerdene.

Bajarê Freiburgî de zî bi eynî waştişî aktîvîteyêke ameye kerdene. Qiseykerdişan de ame vatene ke Sînan Dêrsimî xeylêk waranê cîya cîyayan de têkoşîn kerd û her ca de rêçê xo verdayî.

Paytextê Swêdî Stockholm de zî semedê vîrardişê Sînan Dêrsimî aktîvîteyêke ameye kerdene. Aktîvîteya ke merdimê şehîdan û xeylêk kesî tewrê ci bîyî derheqê cuya Dêrsimî de sînevîzyon ame seyrkerdene.

Bajarê Strasbourgî yê Fransa de zî bi aktîvîteyêke Sînan Dêrsim ame vîrardene. Aktîvîte de embazanê Sînan Dêrsimî yê têkoşînî qisey kerd.

Paytexê Yunanistanî  Atina de zî semedê vîrardişê Endamê Konseya Fermandarîye yê HPGyî Sînan Dêrsimî aktîvîteyêke ameye kerdene.