Nobeta Azadîye  ya ke 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene hewteyê 466. de ya.

Çalakîya ke verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê Îşkenceyî ya Konseya Ewropa (CPT) de yena kerdene no hewte hetê TJK-E ra ameye dewrgirewtene.

Bi nameyê çalakwanan Sakîne Elbîstana ke qisey kerd vist vîrî ke têkoşînê cinîyan ê kurdan paradîgmaya Abdullah Ocalanî esas geno û vat: ''Cinîya kurde sere de Têkoşînê Azadîye yê Kurdan heme têgêrayîşanê azadîwaştoxan ê dinya rê serkêşîye kena.'' Elbîstane Abdullah Ocalan sey xeta sore ya kurdan name kerde û vat: ''Bi tecrîdê serê Rayber Apoyî yeno waştene ke têkoşînê cinîya kurde ya azade bêro şiknayene. Dewleta tirke dişmenê têkoşînê cinîya azade yo. Şiknayîşê tecrîdî do bibo serkewtişê têkoşînê cinîyan.''