Avûkata Guvene: Problemê Guvene yê vînayîş û konsantrasyonî estê

Avûkata Guvene Cemîle Turhalli Balsake: Xusûsen zî netîceyê vilabîyayîşê dîqetî de hendî nêeşkena kitab biwano. Problemê aye yê vînayîş û konsantrasyonî estê. Bi xozayî fealîyetê ke eşkayêne verî bikero hendî nêeşkena.

Hemsereka Kongreya Cimatê Demokratîke (KCD) û parlamentera HDPyî ya Colemêrgî Leyla Guvene roniştişê dewaya xo ya 7ê Teşrîna peyêne ke bi SEGBÎS tewrê ci bîbî de eşkera kerdibi ke aye seba wedartişê tecrîdê serê Rayberê Şarê Kurdî Abdullah Ocalanî dest bi grevê vêşanîye kerdo.

Çalakîya Guvene ewro kewte roja xo ya 70ine. Guvena ke netîceyê çalakîye de weşîya ci bîya xirabe dimayo ke Mehmet Ocalan 12ê Çile de şibi Îmrali de pêvînayîş viraştibi zî eşkera kerdebî ke a do çalakîya xo nêqedîno.

Avûkata Guvene Cemîle Turhalli Balsake derheqê prosesê ‘muhakemekerdişî’, grevê vêşanîye û halê nikayênî de ANFyî rê qisey kerd.    

PROSESÊ TEPIŞYAYÎŞÊ GUVENE

Balsake nê vatî: “Dima ke a sey parlementere amî weçînitine ma veradîyayîşê ci mehkema ra waşt. Waştişê ma sere de hetê mehkema ra bica ame dîyene û qerarê tehlîyeya aye da. Heme fealîyetê aye û eşkerayîyê aye yê ke sey hemsereka KCDyî kerdê sey sebebê sûcî ameyê dîyene. Seba ke nê wesf û mahîyetê sûcî de kesî ra kesî bedilyayîş virazîyayêne mehkema tehlîyeya Guvene waştibi. No qerarêko muhîm bi. Ma pawitêne ke heman roje de bêro tehlîyekerdene. La ma dî ke muameleyê tehlîye giran yenê kerdene. Fam bîyêne ke no qerarê tehlîye xusûsen giranî yeno kerdene û ma îdareyê zîndanî ra zî bi nê hesîyayî.”

'ÇIMÊ MEHKEMEYAN TERSAYO'

Balsake wina domna: “Dimayo ke qerarê tehlîye ame redkerdene ran ata hetê Guvene ra çîyêk nêbedilya. Aye bi xo sîyasetkar a û helbet vatiş û beyanatê aye sebebê estbîyayîşê aye yê. Xora no hal tena meseleyê Guvene de nêvirazîya, halê heme parlamenteranê HDPyî de ma nê prosesî ciwîyayî. Ma zanê ke qeraro rastekîn ê mehkema tehlîyeya Guvene bi, la dima ra qerarê dewamkerdişê halê tepiştişî ramojneno ke mehkema bi îradeyê xo nêdayo. Xusûsen dimayê prosesê OHALî ra heme mekanîzmayanê muhakemeyî de xoantişêk û çimtersayîşêk esto. Eslê xo de nêeşkenê qerarêk bidê. Ma nê xeylî muhakemekerdişan de vînenê.” 

'MA RONIŞTIŞ DE PÊHESÎYAYÎ KE DO BIKEWO GREV'

Av. Balsake ard ziwan ke seba ke înan waşto Guvene bi kelemçe biyarê mehkema aye red kerdo û bi SEGBÎS tewrê mehkema bîya û nê vatî: “Hayîya ma çinbî ke a do bikewo grevê vêşanîye. Aye gama ke tewrê SEGBÎSî bîye sere de bale ante tecrîdî ser û vat ke no sûcêkê merdimîye yo. Dima ra ard ziwan ke seba şikitişê tecrîdî aye dest bi grevê vêşanîye kena. Dimayo ke aye dest bi grevê vêşanîye kerd teberê ma de embazanê ma yê avûkatan ê bînan zî aye dir pêvînayîşî viraştî. Seba ke hetê îdareyê zîndanî ra tedbîrê seba pawitişê heqê weşîya parlamentera ma bêro bicaardene ma teşebusî kerdî. Gama pêvînayîşan de zî heta ma dest ra ameyêne ma nêwaştêne ke aye bikerê rincan.” 

'MORALÊ AYE ZAF BERZ O'

Balsake nê ardî ziwan: “Birêze Guvene çîyêk ke ci ra bawer kena bica ana. No fikir zî wedartişê tecrîdo girankerde yê serê birêz Ocalanî yo. Hetêna ra Qanûnê Înfazê Ceza yê Tirkî de tecrîd çinyo. Heta eksê ci de qanûnî estê. Waştişê parlamentera ma zî no yo ke Tirkîya sere de qanûnanê xo bica biyaro. Gama ma waştêne ke problemanê aye yê weşîye biyarê ziwan aye vatêne ke nê çîyî meyarê rojdem. Ewro zî ez seba pêvînayîşê aye şîya zîndan. La aye nêeşkaye vejîyo pêvînayîş. Ma vînenê ke waştişê aye seba aye heme çîyî ra muhîmêr o.” 

HALÊ WEŞÎYE YÊ GUVENE

Av. Balsake peynîya qiseykerdişê xo de nê vatî: “Parlamentera ma vana ke waştişê aye waştişêko şexsî nêyo, seba her kesî no waştiş muhîm o. Aye wedartişê tecrîdî sey merheleyêka aşitîye vînena. Goreyê fikrê mi yê şexsîyî ra birêze Guvene cuya her kesî fikrêna. Verî her roje wendêne la hendî nêeşkena. Problemê aye yê vînayîş û konsantrasyonî estê. Nêeşkena spor zî bikero. Seba ke nêeşkena rayra şiro nêvejêna pêvînayîş zî. Heta aye dest ra yeno mektûbanê ke aye rê yenê înan rê cewab dana. Çunke her cayê Tirkîya ra aye rê mektûbî yenê. La xusûsen kewtişê tansîyone nê prosesî de aye fîneno halêkê zorî mîyan. Doktorê zîndanî û wezîfedarê weşîye her roje kontrolanê aye kenê. Xora Wezaretê Edaletî 15 rojî yo ke ûca 24 saetî ambulanse hadre vindarnenê.”