Aydenîze: Kuçeyan de têkoşînê ma do bêro domnayene

Hemsereka Pêroyî ya DBPyî Salîha Aydenîz vera operasyonê qikerdişê sîyasîyî yê ewroyî hêrsê xo ard ziwan û vat: ''Cinîya kurde ke bi xoverdayîşê xo bîya çimeyê îlhamî yê dinya, gerek têna merverdîyo. Kuçeyan de têkoşînê ma do bêro domnayene.''

Ewro operasyonê qirkerdişê sîyasîyî yê Amedî aktîvîstê TJA, rojnamegerî, endamê meclîsê şaredarî, îdarekar û endamê rêxisita komelê sivîlî zî tede xeylêk cinîyî ameyî destbendkerdene.

Derheqê babete de Buroyê Îrtîbatî yê Pêroyî de yê Partîya Herêman ê Demokratîkan (DBP) de eşkerayîyêke ameye dayene. Hemsereka Pêroyî ya DBPyî Salîha Aydenîz, Hemvervatoxa Kongreya Demokratîke ya Şaran (HDK) Îdîle Ugurlu, parlamenterê HDPyî Dersime Dag, Remzîye Tosun û Feleknaz Uca tewrê ci bîyî.

Salîha Aydenîz vat: ''Têgêrayîşê Cinîyan ê Kurdan wero heme dinya de sey çimeyê îlhamî yo. Coka îqtîdaro faşîst tira teseno. Sereştişanê ewro de berê keyeyan ameyî şiknayene û embazê ma bîlasebeb ameyî destbendkerdene. Îqtîdaro faşîst wazeno yew veng û yew reng biaferno. Cinîyî vera nê zîhnîyetê fasîtî têkoşîn kenê. Têgêrayîşê Cinîyan ê Kurdan yew sîstem o ke hetê cuyeyêka azade de yo. Sîstemo faşîst zî vera cinîyan û demokrasîyî nas nêkeno. Têkoşînê cinîyan sîstemêk o. Ma zî leteyê ey sîstemî yê. Têgêrayîşê Cinîyan ê Azadan têna nîyo. Her roje bi gamanê girdan pîlêr beno. Cinîyê kurdan goreyê îqtîdarî tênêgêrayî, goreyê waştişê azadîye form girewt. Têgêrayîşê Cinîyan ê Azadan û Têgêrayîşê Azadîye yê Kurdan do heta peynî têkoşîn bikero.

Cinîyan bi keda pîle destkewteyî fînayî dest ke ê destkewteyê cînîyan gerek bi yewbîyayîş û xurtkerdişê têkoşînî bêrê pawitene. Gerek cinî kuçe, meclîs û her warê cuye de bêrî têhet û xoverdayîşê xo pîlêr bikerê. Wa her kes bizano ke ma do çirey peyser game meerzê. Êyê ka vanê qey cinîyî teslîm benê xelitîyenê. Gerek cinîyê kurdan ke bîyî çimeyê îlhamî yê dinya têna merê verdayene. Nê hêrişî vera cinîyan ê Tirkîya û yê dinya yê. Ma wayîrê mîrasê girdî yê. Ma wayîrê mîrasê Sakîne Cansizan, Rosayan û Clara Zetkînan ê. Ma do bi nê mîrasî kuçeyan de têkoşîn rê dewam bikerê.''