Ayhan: Wayîrvejîyayîşê Heskîfî wayîrvejîyayîşê merdimîye yo

Vervatoxê Cehdkerdişê Ciwîyayîşî yê Heskîfî Ridvan Ayhanî derheqê çinkerdişê tarîxê 12 hezar serre de nêrazîbîyayîşê xo mojna û vat: "Heskîf têna mîrasêma nîyo, mîrasê pêro merdimîye yo. Wayîrvejîyayîşê Heskîfî wayîrvejîyayîşê merdimîye yo."

Bi Awbendê Ilisuyî wazenê Qezaya Heskîfî ya ke 12 hezar serre yo binê awe de bimana. Heskîfî de talankerdiş û rijnayîşê ca û waranê tarîxîyan dewam keno. Zaf berhemê tarîxî Heskîfî ra gênê benê û cayê înan de TOKÎyan înşa kenê.

Vervatoxê Cehdkerdişê Ciwîyayîşî yê Heskîfî Ridvan Ayhanî derheqê rewşa peyêne ya Heskîfî de ANFyî reyde qisey kerd û ard ziwan ke seba xelisnayîşê Heskîfî hema zî hêvî esta û vat: "Ganî seba naye zî merdim vengê xo berz biko û nêverdo ke awbend bêro viraştene. Senî ke wextê felaketêkê xozayî de yan zî serebûtêkê bînî de rojname û televîzyonan de qisey kenê ganî seba Heskîfî zî qisey bikê. Qirkerdişê kulturî yeno kerdene. No felaket o û ganî her kes vera nê felaketî vengê xo vejo."

"Heskîf seba pêro merdimîya dinya mîrasê tarîxî yo. Ma wazenê destpêkê Heskîfî bêro pawitene û cigêrayene. Wayîrvejîyayîşê Heskîfî wayîrvejîyayîşê merdimîye yo. Hema zî hêvî esta. Ma eşkenê Heskîf bixelisnê. Seba naye zî ganî merdim vengê xo berz biko û nêverdo ke awbend b3ero viraştene. ''

 ''Ma vera restorasyonî nîyê. La Heskîf bi bombayan û betonan yeno restorekerdene. Ganî esasê pawitişê tarîxî ser o bêro restorekerdene. Armancê înan têna no yo ke tîya bêmerdiman biverdê. 199 cayê cuye binê awe de manenê. 100 hezar merdimî do bê war û mal bimanê. Erdê tewr bibereket binê awe de bimanê. Citkarî, zîret û heywanî zî di xelas bibê. Awbendê Ilisuyî gef ro Iraqî zî waneno. "

Ayhanî îfade kerd ke zaf berhemê tarîxî yê Heskîfî sey  Turbeya Zeynelbegî, Turbeya Îmam Abdullah, Mînareyê Camîyê El-Rizikî, Camî û Mînerayê Selahattîn Eyûbî, Hemama Artuklu û Berê Roma heta nika ameyî rijnayene û berdene bi cayê bînan. Ayhanî vat: "Tarîx cayê xo de rind o. Biverdê cayê xo de bimano."

"Gelîya Botanî zî gelîyanê girîngan ê Mezopotamya ra ya. Çemê Botanî yo ke gelî ra derbaz beno çimeyanê girîngan ê awe yê herêmî de ca gêno. Awbendê Îlisuyî gef ro Gelîya Botanî zî keno."