Sîyasetê krîmînalîzasyonî yê dewleta almanî yê vera sazgeh û dezgehanê kurdan demo peyên de zêdîyayî. Bado ke Wezîrê Karanê Teberî  yê Tirkîya Mevlut Çavuşogluyî perey Berlin zîyaret kerd vizêr bajaranê Nurnbergî de eşt Keyeyê Şarî yê Medya ser.

Polîsanê ke ber û pencerayê komele şiknayî kewtî zere, cigêrayîş de komele serûbin kerd û dest na malzemeyanê buro yê komele ser. Bi hewayêkê hemwextî keyeyê Makbule Kartal ame sereştene û meymanê ci  aktîvîsto kurd Mîrza B. ame destbendkerdene. Keyeyê Kartale de bîlgîsayar, telefonê destî, kameraya dîjîtale, hard diskî û pereyê ke semedê mexdûranê Korona ameybî arêdayene zî ameyî destsernayene.

Federesyonê FCK-BW-Bayern û Baden-Würtembergî derheqê babete de eşkerayîya nuştekîye daye û hêrişê polîsan şermezar kerd. Eşkerayîye de bale ameye ser antene ke sereştiş bado ke Wezîrê Karanê Teberê yê Tirkîya Almanya zîyaret kerd ame kerdene û ame vatene ke oyo ke ganî bêro destbendkerdene Erdogan o. Eşkerayîye de veng dîya hukmatê Almanya ke wa semedê karanê xo kurdan qurban nêkero.

Saetanê şanî de semedê paştdayîşê Keyeyê Şarî yê Medya verê berê ci de çalakîya şermezarkerdişî ameye kerdene. Çalakîya ke xeylêk dezgehê kurd, tirk û almanan tewrê ci bîyî de sîyasetê krîmînalîzasyonî yê Almanya yê vera kurdan ame şermezarkerdene.

Wezîrê Karanê Teberî  yê Tirkîya Mevlut Çavuşogluyî perey Berlin de Wezîrê Karanê Zereyî  yê Almanya Horst Seehoferî reyde pêvînayîş kerdbi û dima ra medyaya sanalî de pare kerdbi ke înan muhîmîya têkoşînê hemparî yê vera PKKyî pê kerd. No vatişê Çavuşogluyî sey zêdîyayîşê zextanê vera kurdan amebi fehmkerdene. Serranê verênan de zî  badê zîyaretê selahîyetdaranê Tirkîya yê Almanya dezgehê kurdan bibî hedefê polîsan.

Ewro do saete 15 de meydanê Aufseßplatzî de çalakîya şermezarkerdişî bêro kerdene.