Baran: Ganî paştî bidîyo Nobeta Edaletî

Hemserekê MED TUHAD-FEDî Zekî Baranî bale ante Nobetanê Edaleyî yê merdimanê tepişteyan ser û venga her kesî da ke paştî bido nê çar Nobetanê Edaletî.

Hemserekê Federasyonê Komeleyanê Paştdayîş û Huqûqî yê Keyeyanê Tepişteyan û Hukmwerdeyan ê MEDî (MED TUHAD-FED) Zekî Baranî derheqê tedayanê vera zîndanan de ANFyî rê qisey kerd. 

Baranî dîyar kerd ke wextê janê Korona de têkilîya tepişteyan a bi keyeyanê înan ameye birnayene, wextê peyênî de pêvînayîşê têrîyî dîyayî destpêkerdene la nê pêvînayîşî hînî 15 deqayan ê. Baranî vat: ''Keyeyî wextê zîyaretan de raştê ferzkerdişanê vera merdimîye yenê, tay keyeyan rê cigêrayîşo rût yeno ferzkerdene. Ganî dezgehî paştî bidê keyeyan. Ma xîret kenê ke meseleyanê keyeyan bîyarê rojdem. Avûkat û keyeyî seba ke ma xo biresnê tepişteyan tek rayîr ê. Dezgehê ma nêeşkenê şorê pêvînayîşî. Ma ge ge raporanê serê zîyaretan amade kenê û bi nê hawayî rayaumûmîye agahdar kenê.''

Baranî bale ante Nobetanê Edaletî yê Amed, Wan, Îstanbul û Îzmîrî kerde û vat: ''Keyeyanê tepişteyanê nêweşan nobetî dayî destpêkerdene. Ganî her kes paştî bido nê nobetan. Seba ke vengê keyeyan bêro eşnawitene dezgehê ma destê ci ra çi yeno keno, ma tewrê her çar çalakîye benê. Vera tepişteyan û keyeyanê tepişteyan teda û şîdeto psîkolojîk yeno kerdene. Ganî rêxistinê komelê sivîlî û rayaumûmîye ney hol bivînê çunke îqtîdar seba ke nê kerdişan mîyan bikero komelî rê krîzanê viraşteyan ferz keno.''