Jan Beth-Şawoce wextêkê dergî ra nata qezaya Sodertelje ya Stockholmî de maneno ke tede tewr tay 30 hezar asûrî-sûryanîyî ciwîyenê. Beth-Şawoce pê cigêrayîşanê xo yê serê qirkerdişê Sayfoyî şinasîyeno û ronayoxê Weşanxaneyê Nsîbînî yo. Babeta Sayfoyî de ey xeylêk cigêrayîşî kerdî û heta nika xeylêk kitabî nuştî. Beth-Şawoceyî derheqê prosesê verê Sayfo-15î de ANFyî rê qisey kerd.

Beth-Şawoceyî da zanayene ke qirkerdişê Sayfoyî verî têna soxbetan de qala ci ameyêne kerdene la nika zanîngehan de sey babeta tarîxî yeno cigêrayene.

Beth-Şawoceyî vat: ''Nika ma babeta peydakerdiş, arêdayîş, cigêrayîşê  dokumantena de wayîrê tecrubeyî yê. Mîsal Tirkîya de zaf brokratan vîrameyîşê xo yê sivîl û leşkerî nuştî, zaf agahîtî dayî. Hînî pê rayîrê înternetî kesê ke wazenê eşkenê xo biresnê nê zanayîşan. Ma her roje dokumentanê neweyan peyda kenê.''

Qirkerdişê sûryanîyan ê 1915î de hetê Osmanîyan (Sayfo) ra ame kerdene. Parlamentoya Swêdî de no serebût sey qirkerdiş qebul kerd. Labelê rixmo ke sozê ci ameyo dayene Demokratê Sosyalî Sayfo sey polîtîkaya dewlete qebul nêkenê.

Beth-Şawoceyî babete ser o vat: ''Tay sebebê ci estê. Sebebo destpêk zî polîtîkaya dîplomatîke ya hêrişkere ya Tirkîya ya ke bingeyê ci înkar o. Wexto ke qala qirkerdişî yena kerdene vera hemwelatîyan na qale şuxilîyena. Mîsal merdimê ke seba tatîlî şinê Tirkîya nînan rê heqaret yeno kerde, kişîyenê, qij yenê dîyene ûsn.

Wextêkê dergî ra nata ma Sayfoyî ser o cigêrayîşan kenê. Cigêrayîşê ma bi hawayêkê hîrayî dewam kenê. Ma do nê berheman biweşanê.''