Pê venga Koordînasyonê Koma Dostanîya bi Kurdan a Parlamentoya Ewropa derheqê Dewaya Kobanê de seba ke paştî bêra dayene HDPyî verê Parlamentoya Ewropa ya Brukselî de çalakîyêke kerde.

Sosyalîst&Demokrat, Endamê Koma Îtîfaqê Averî, Parlamentera Avusturya Andreas Schieder, parlementerê Hollanda Thijs Reuten, parlementera Fransa Leila Chaibi, parlementerê  Yewnanistanî Dimitrios Papadimoulis, parlementerê Baskî Pernando Barrena, parlementera Almanya Ozleme Alev Demirel, parlementerê Îspanyol Miguel Urbán Crespo, parlementerê xoserî yê Katalanya Carles Puigdemont I Casamajó, Antoni Comín - Oliveres û Clara Ponsatí Obiols û Hemserekê Partîya Keskan a Ewropa Evelyne Huytebroeck, Temsîlkarê HDPyî yê EWropa Devriş Çimen zî tede xeylêk şewirmendê kome û xebatkarê parlamento tewrê çalakîye bîyî.

Parlamenteranê Parlamentoya Ewropa pê mesajêkê hemparî da zanayene ke ê paştî danê HDPyî û welatanê Yewîya Ewropa ra wazenê ke wa rejîmê Erdoganî rê teda bikerê.

Dimitrios Papadimoulisî da zanayene ke Tirkîya de edalet çin o û vat: ''Dewayê Selahattîn Demîrtaşî de û wedaritişê Peymanê Îstanbulî mojnenê ke Tirkîya de girîngîya huqûqî çin a. Ganî her hetî ra vera Tirkîya tewir bêro mojnayene.''

Andreas Schiederî zî ard ziwan ke polîtîkaya vera HDPyî edîl nîya û vat: ''Ma paştdayîşêkê xurtî danê HDPyî. Çîyo ke vera HDPyî yeno kerdene huqûq de cayê ci çin o. Ma bi ziwanêkê tûjî Erdogan rexne kenê.''

Reuten Thijsî vat: ''Ma paştdayîşêkê xurtî danê HDPyî ke bi hawayêkê bêhuqûqî Tirkîya de yenê muhakemekerdene. Parlementer û şaredarê HDPyî wa cade vera bidîyê.''

Leila Chaibi vat: ''Ma hetê HDPyî de yê. Ganî ma mesaj bidê Erdoganî ke vera muxalîf û kurdan goreyê keyfê xo huqûq nêşuxulno. Kurdan vera terorî hetkarîya ma kerde, ganî ma zî paştî bidê kurdan.''