Licê de cenazeyê 4 gerîlayan badê 44 rojan ameyî girewtene
Cenazeyê 4 gerîlayanê HPG’yî yê ke pêkewtişê qezaya Licê ya Amedî de cuya xo vînî kerde badê 44 rojan hetê keyeyan û şarî ra ameyî girewtene.
Cenazeyê 4 gerîlayanê HPG’yî yê ke pêkewtişê qezaya Licê ya Amedî de cuya xo vînî kerde badê 44 rojan hetê keyeyan û şarî ra ameyî girewtene.
Qezaya Licê ya Amedî de 44 rojî yo ke meyîtê 4 gerîlayanê HPG’yî yê ke operasyon de cuya xo vînî kerde, herêma operasyonî de yenê vindarnayene. Keyeyan ewro meyîtê xo girewtî.
2’ê Hezîrane de wareyê bejikî yê Mehlaya Bayirli ya qezaya Licê ya Amedî de operasyonêk ame destpêkerdene. Çarçeweya operasyonî de pêkewtişê 3’ê Hezîrane de 5 gerîlayanê HPG’yî cuya xo vînî kerdebî. Nînan ra meyîtê Ferhat Kocakayayî (Rizgar Amed) amebi girewene û Licê de amebi definkerdene. Meyîtê Îbrahîm Çelîk (Mahîr Andok), Abdullah Turhan (Rêber Amed), Omer Demîrêl (Serhildan Mazî) û Yûsûf Kayranî ( Zinar Akro) 44 rojî yo ke herêma operasyonî de yenê vindarnayene û rixmê heme muracatan keyeyanê înan nêdîyenê.
Keyeyî ewro pîya bi şarî şîyê herêma operasyonî û meyîtê xo girewtî. Cenazeyê ke pê bombayanê kazanî ameyî letekerdene hetê keyeyanê ci ra ameyî arêdayene û ameyî berdene bi Mehleya Bayirli. Cenazeyî tîya hetê parlamenterê HDP’yî, Serdozgerê Komare ya Licê û avutan ra ameyî pêşwazîkerdene û ûca ra ameyî berdene bi Fermandarîya Cendirmeyan ê Qezaye.