Ciwanan ra seba azadîya Rayberê Şarê Kurdî çalakîyê bêîteatîya sîvîle

Ciwananê kurdan seba ke bale biancê tecrîdê serê Rayberê Şarê Kurdî Abdullah Ocalanî ser Swîsre û Fransa de kanalanê televîzyonan de çalakîyê bêîteatîya sîvîle kerdî.

Ciwanê kurdan bi rojano seba ke Rayberê Şarê Kurdî Abdullah Ocalanî dir pêvînayîş bêro kerdene û tecrîd bêro wedaritene kuçeyan de yê.

Bajarê Cenevre yê Swîsre de Aktîvîstanê Têgêrayîşê Ciwanan ê Şorişgêran û Cinîyan ê Ciwanan ê Têkoşêran Radyo-Televîzyonê neteweyî yê Swîsre de çalakîya bêîteatîya sîvîle kerde. Ciwanan kurdkî û fransizkî sloganê eştî azadîya Rayberê Şarê Kurdî waşte.

Ciwananê ke selahîyetdaranê dezgehê de qisey kerd dereheqê tecrîdî û qewimîyayîşanê peyênan ê derheqê Ocalanî de zanayîş da û waşt ke ê derheqê babete de programêk virazê. Selahîyetdarê kanalî soz da ke ê do mîyanê çend rojan de programêk virazê.

Paytextê Fransa Paris de zî bi eynî waştişî çalakîyêke ameye kerdene.  Aktîvîstanê Têgêrayîşê Ciwanan ê Şorişgêran seba ke keye û avûkatî Rayberê Şarê Kurdî Abdullah Ocalanî bivînê  kanalê Canal+ TVyî de çalakîya bêîteatîya sîvîle kerde. Polîsan hêrişê ciwanan kerd.