Dayîkî: Ma kuçeyan de vengê domananê xo danê eşnawitene

Dayîkê ke domanê înan zîndanan de ê zî teber de vera tecrîdî xover danê veng danê hukmatî ke wa tecrîd cade bêro wedartene û vernîya mergan bêro girewtene.

Dayîkê ke bi laçiganê xo yê sipîyanê ke sembolê aşitîye yê bi hewteyan o ke semedê bicaardişê waştişanê domananê xo kuçeyan de yê veng da hukmat ke wa tecrîd wedaro.

'Ganî tecrîd cade bêro wedartene'

Dayîka Tugba Cane ya ke 15’ê Çele ra Zîndanê Baybûrtî de  grevê vêşanîye de ya,  Zîynet Cane vist vîrî ke kênaya aye vato ‘Tena Rayberîye nê ma heme binê tecrîd de yê. Heta ke tecrîd temamî de nêro wedartene do çalakîya ma dewam bikero. Şima zî teber de bibê vengê ma’ û va: ’’Waştişê domananê ma biheq ê. Ma zî heta peynî kiştê înan de yê, paştî daynê înan. Dewlet ganî goreyê huqûqê xo tê bigêro û waştişê domananê ma bica bîyaro.’’

'Heta wedartişê tecrîdî çalakîyê ma do dewam bikerê'

Dayîka Metîn Keleşî yo ke 2015 de hêrişê DAÎŞ’î yê qezaya Pirsûsî ya Riha de birîndar ame tepiştene, Hamdîye Keleşî vat ke lajê aye 5’ê Çele ra nata grevê vêşanîye de yo û no mesajê ey pare kerd: ‘Ma semedê şarê xo mucadele kenê. Eke hewce bikero ma semedê şarê xo mirenê zî. Heta ke tecrîd tam nêro wedartene ma çalakîya xo rê dewam kene.’ Dayîke Hamdîye ard ziwan ke halê domananê înan biyo giran û va: ’’Gama ke ez rewşa lajê xo  persenê vano, ‘Daye rewşa ma destê şima de ya. Eke şima teber de xover bidê rewşa ma do hol bo.’ Ma dayikî kuçeyan de yê. Ma wazenê vengê domananê xo bê. Wa hinî vengê ma bêro eşnawitene, tecrîd bêro wedartene. Heta waştişê domananê ma nêrê ca çalakîyê ma zî do dewam bikerê.’’

 ‘Ma do bibê vengê domananê xo yê teberî’

Dayîka Ridwan Ûlaşî yo ke 1’ê Adare ra nata Zîndanê Tarûsî de grevê vêşanîye de yo, Wesîle Ûlaşe ard ziwan  ke lajê aye 21 kîlo dayî û va: ’’ Semedê lajê mi û heme xoverdayoxan qesawetê mi esto. Ma şewe nêeşkenê rakewe. Beno ke her hele xebera mergî bêro. Domanê ma wazenê ke ma xover bidê, ma zî semedê înan mucadele kenê. Ma dayîkan soz dayo ewladanê xo, xoverdayîşo ke înan zere de dayo destpêkerdene ma do teber de vengê nê bê. Hukmat ganî vengê ma bieşnawo, yewna rayîrê înan çîn o. Ma zî sey domananê xo biqerar ê no xoverdayîş do ser bikewo.’’