Şaristanê Den Haagî yê Hollanda û şaristanê Cenevre yê Swîsre de pê çalakîyan Partîya Sosyalîste paştî daye HDPyî.

Den Haag

Partîya Sosyalîste seba paştdayîşê HDPyî verê Sersefîrîya Tirkîya de çalakîyêke kerde. Çalakîye de seba 108 sîyasetmedaranê ke Dewaya Kobanê de yenê muhakemekerdene 108 findeyî ronîyayî. Endamê Meclîsê Şaredarîye yê Partîya Sosyalîste Murat Memîşî îfade kerd ke Tirkîya de pêro muxalîfî maruzê teda benê. Senator Tiny Koxî zî da zanayene ke o seba ke biranê Konseya Ewropa bidê Sersefîrîye şîyo la sersefîr nêvekîyo teber. Koxî birî eştî qutuyê postayan. Koxî vat: ''Têkoşînê ma do dewam bikero.''

Cenevre

Çalakîya Partîya Sosyalîste ya Swîsre de aktîvîstê Îtîfaqê Çepî zî amade bîyî. Sîyasetmedar Demîr Çelîkî nameyê HDPyî ser o qisey kerd û bale ante ser ke dewleta tirke serranê 90an ra nata xîret kena ke îradeyê sîyasetê kurdan bişikna.  Wekîlê Partîya Sosyalîste Carlo Sommarugayî zî vat: ''Seba ke Swîsre Tirkîya rê ambargo bikera destê ma ra çita bêro ma do bikerê û ma do tim paştî bidê HDPyî. Ma seba ke tedaya vera HDPyî biqeda vernîyazêk bidê parlamento.'' Çalakîye de wekîlan û endamanê rêxistinanê komelê sivîlî seba ke bierşawê HDPyî fotografêk girewt.