Vera qeyûmê Şaredarîya Dêrsimî çalakîyî dewam kenê. Vizêr zî serkêşîya Komeleyanê Elewîyan ê Demokratîkan (DAD) de Meydanê Seyît Rizayî de, verê peykerê Seyîd Rizayî de çirayî ameyî tavistene.

Wekîla DEM Partî ya Dêrsimî Aytene Kordu, Hemşaredarê Dêrsimî Cevdet Konako ke herinda ci de qeyûm ameyo tayînkerdene, xeylê temsîlkarê dezgehanê demokratîkan tewrê çalakîye bîyî. Çalakîye de pankarta 'Ma şima ra razî nîyê, wa Heq zî şima ra razî nêbo' ameye akerdene.

Sekreterê DADî Asîl Benlerî da zanayene ke ê roja elewîyan a fîraze pancşeme de vera qeyûmî ameyê pêser. Asîl Benlerî pare kerd ke vera ocaxanê elewîyan zî qeyûmî ameyê tayînkerdene û vat: ''Wazenê Dêrsim bê kurd û elewîyan bimano. Ma qeyûman qebul nêkenê.''

Ocaxê Kureyşanî ra Fetîye Yildirim gulbang da û dima çirayî ameyî tavistene.

Girse bi çalakîya roniştişî vila bi.