Qezaya Tutaxî  ya Agirî de leşkeranê tirkî vizêr saetanê serê sibayî de eşt dewa Mûşîyanî ser. Ame zanayene ke wextê operasyonî  hemwelatijo bi nameyê Murat kaya yo ke babîyê 3 domanan o hetê leşkeran ra ame qetilkerdene.

Dewe de 10 kesî ameyî destbendkerdene û keso bi nameyê Cemal Aksoy zî birîndar bi û Nêweşxaneyê Cigêrayîşî yê Wanî de yeno tedawîkerdene. Ame vatene ke xeylêk dewijanê bînan rê zî hetê leşkeran ra îşkence ame kerdene.

Birayê Murat Kayayî Mehzer Yalçinî vat: ‘‘Saetanê serê sibayî de leşkerî ameyî dewe. Ma meraq kerd vejîyayî teber. Vengê çekan ame. Ma peyser agêrayî keye. Birayê mi o wext cayê qewimîyayîşî rê nêzdî bi.O zî sey me meraq ra vejîyabi teber û linganê ci de terlîk estbî. Birayê mi Fettah Yalçin destbend kerd û ma nika nêzanê ça de yo. Dewe de cinîyî zî mîyan de bi desan kesî destbend kerdî. Birayê mi bêsuc ame qetilkerdene.‘‘