Serê qirkerdişê Zîlanî ra 89 serrî ravêrtî ke dewleta Tirkî serra 1930 de qezaya Erdîşî ya Wanî de kerdibi.

Dewleta Tirkî heta nika hesabê tu qirkerdişanê ke kerdê nêdayo, ekes nê de bi zihnîyetê qirkerdişî û nîjadperestîye hewna zî sûcanê teberê merdimîye kena. Dewleta Tirkî seba qirkerdişê Zîlanî binimno dest dabi serê erdanê dewijan û no hal hewna zî dewam keno. Serra 1930 de herêma Zîlanî de 60 dewî ameybî vêşnayene û raşîyayene, bi hezaran merdimê ê dewan ameybî kiştene. Goreyê çimeyanê fermîyan ê dewlete 15 hezarî kesî, goreyê çimeyanê cayîyan nizdê 50 hezar merdimî ameyê kiştene. Qirkerdişî ra dima tayê dewî bi temamî raste ra ameyî wedartene, ke ê dewî reyna qe nêameyî dîyene. Bîrhan, Sarkoy, Bonîzlî, Mîlk, Gomîk, Pîrneşîn, Şorîk û Mîrşûd ê dewan ra çend dew ê.

Erd û hêgayê dewanê Bîrhan, Sarkoy, Bonîzlî, Mîlk, Gomîkî Kirgizan rê ameyî pêşkêşkerdene ke hetê dewlete ra herême de ameybî bicakerdene. Qirkerdiş tewr zaf nê dewan de ame kerdene û gorê komî nê doran de yê. Erd û hêgayê ke mendî zî wextê Suleyman Demîrelî de bi viraştişê Awbendê Koçkopruyî binê awe de ameyî verdayene ke gorê komî înan de estbî. Dewleta Tirkî na rey zî bi projeyê Santralê Hîdroelektrîkî yê Gelîyê Zîlanî wazena şopanê qirkerdişî bi temamî raste ra wedaro. Akademîsyen Sedat Ûlûganayî vat ke dewlete seba qirkerdişo ke herême de ameyo kerdene eşkera nêbo her çîyî kena û vat, „Ganî ma hemverê Santralê Hîdroelektrîkî de vejîyê, ganî eseran bipawê.“