Kurdîstanijan û dostanê înan şaristananê cîya-cîyayan ê Ewropa de pê çalakîyan hêrişê dewleta tirke yê vera waranê Zap, Metîna, Avaşînî yê Herêmanê Pawitişî yê Medya şermezar kerdî.

Paytextê Almanya Berlin de aktîvîstanê TCŞ û TÊKO-JIN vera hêrişan çalakîyêka rayraşîyî kerde. enternasyonalîstî zî tewrê rayraşîyayîşî bîyî. Ciwanan xoverdayîşê gerîlayan selam kerd.

Çalakîya Stuttgartî de bale ameye antene xoverdayîşê destankî yê gerîlayan ser û mesaj ame dayene ke ê do timûtim kişta gerîlayan de bê. Reyna tecrîdê Îmraliyî zî ame şermezarkerdene û azadîya Rayberê Şarê Kurdî Abdullah Ocalanî ameye waştene.

Çalakîya Saarbruckenî de xoverdayîşê gerîlayan ame selamkerdene. Çalakîye de bêvengîya hêzan ê mîyanneteweyîyan ê vera hêrişan ameye şermezarkerdene.

Mannheim de kurdîstanijan pê çalakîyêke hêrişê îşxalî yê dewleta tirke protesto kerdî û Sînan Dêrsim yad kerd. Qiseykerdişan de ame vatene ke wayîrvejîyayîşê xoverdayîşê gerîlayan wezîfeyê her kesî yo.

Frankfurt de kurdîstanijan û dostanê înan çalakîye de hêrişê îşxalî, peymana serê Şingalî û hêrişê vera Rojawanî şermezar kerdî. Çalakîye de sloganê sey 'Kiştox Erdogan', 'Biciwîyo xoverdayîşê gerîlayan' ameyî vatene.

Kopenhag de verê bînaya Neteweyanê Yewbîyayeyan (NY) de hêrişê îşxalî pê çalakîyêke ameyî şermezarkerdene. Çalakîye de dosyayêke dîyaye selahîyetdaranê NYyî ke dosya de yeno îfadekerdene ke Tirkîya bêdestûrê Yewîya Ewropa, Amerîka û NATOyî nêeşkena nê hêrişan bikera. Çalakîye pê sloganan qedîyaye.

Kurdîstanijanê Rûsya hêrişê îşxalî yê dewleta tirke protesto kerdî. Kurdîstanijan verê Merkezê Kulturê Kurdan ê herêma Stavrapolî de eşkerayîyêke daye û da zanayene ke dewleta tirke nêeşkena nê hêrişan ra netîce bigêra.