Serrgêra 84. ya Terteleyê Dêrsimî de  qurbanî pê aktîvîteyanê cîya cîyayan  şaristananê Ewropa de ameyî yadkerdene.

Aktîvîteya yadkerdişî pê deqayêkê rêzgirewtişî dest pêkerd. Vervatoxê Meclîsê Kurdîstanijan Azad Huseyn Yilmazî tertele şermezar kerd û vat: ''Terteleyê Dêrsimî xo vîr a mekerê, mede vîrakerdene.'' Pîranê Dêrsimî ra Mahmut Yildizî zî îfade kerd ke ê do qetî na barbarîye xo vîr a nêkerê. Aktîvîte de Ozan Aydinî pê kemençe lûrikî vatî.

Koln de rayberîya DÎK, FEDA û KDTKyî ra pê aktîvîteyêke qurbanî ameyî yadkerdene. Aktîvîte de fotografê Seyîd Riza, Sakîne Cansiz û Sînan Dêrsimî ameyî daliqnayene. Şengê Kahraman, Hozan Comert, Aytene Sunger û Munzur Dêrsimî aktîvîte de qisey kerd û qurbanî yad kerdî. Dima findeyî ameyî tavistene, nîyazî ameyî vilakerdene. Seba vîrameyîşê qurbanan gulî erzîyayî Çemê Reinî.

Şaristanê Stuttgartî de rayberîya Kongreya Awanîya Dêrsimî û Komeleya vera Terteleyê Dêrsimî de aktîvîteya yadkerdişî ameye kerdene. Qiseykerdişanê bi kirdkî, almankî û tirkî de ame parekerdene ke 4ê Gulane tarîx de sey 'roja sîya' ca girewt. Dima findeyî ameyî tavistene, loqmayî ameyî vilakerdene.