'Ez kurd a coka neçar a ke tewra çalakîyan biba'

Nurane Abaya ke çalakîyanê têgêrayîşê sîyasî yê kurdan de tim vernî de ya, îfade kerd ke seba têkoşînê rûmetênî yê kurdan a tewr vernîya çalakîyan de ca gêna.

Cinîyê kurdî Kurdîstan de vera sîstemê feodalî û vera hêrişanê dewleta tirke xo ver danê. Nînan ra yew zî Nurane Aba (75) ya. Dayîke Nurane qezaya Dêrikînya Mêrdînî ra ya. 7 serrîya ci de dadîya aye û 15 serrîya ca de babîyê ci merd. Nurane û 3 way û birayê ci neçarî mendî ke keyeyanê cîranan de ca bidê xo.

Dayîke Nurane wina qala hîkayeya xo kena: ''Dima ke babîyê mi zî merd ma keyeyê cîranê xo de ca bîyî. Nê keyeyî zî pê zor ez lajê înan xo reyde zewijna. Mi qet nêwaştêne. La bira û wayê mi keyeyê înan de bîyî. Zewajî verî zî dima zî cuya mi sey jehr bîye. Çîyêkê ma nêmend. Azadîya ma ma destî ra şîye. Zereyê ê keyeyî de mi rê neheqîye ameyêne kerdene la sewbîna cayêk çinbi ke ez şora ci.

Birayê mi seba ke dêsan ser o nuşte nuştêne tepişîya. Polîsan xîret kerd ey bikişê. O eşt morg zî labelê dima ke fam kerd weş o eşt zîndan.  Birayê mi 2 serran zîndan de mend. Wexto ke zîndanî ra vejîya tewrê PKKyî bi. 20 serran koyan de mend û şehîd bi.

Mêrdeyê mi o çax Amed de mîyanî ra cinîyêka bîne de zewijîya. Dima ez pê hesîyaya. Mêrdeyê mi wayîrê mi û 4 domananê ma nêvejîya. Mi ci rê vat eke o zewijîyena ez zî do bizewija. Ey zî ez kuwaya. Xora tim dayêne mi ro. Peynî de ey ez keyeyî ra vete. Ez Amed de ca bîya. Ez Amed şîya pakîya keyeyan û mi wina domanê xo weye kerdî. Ez hende xebitîyayêne ke wextê m tewr çinbi.

Mi uca de têkoşînê azadîye nêzdî ra şinasna û mi tim çalakîyan de tewr vernî de ca girewt. Semedê têkoşînê rûmetênî yê kurdan û ciwananê koy û zîndanan mi vernî de ca girewtêne. Çalakîyan de polîsî tim ma tehrîk kenê. La ez do pê kurdayetîya xo tim tewrê çalakîyan biba. 

Kurdî pê yewîya xo eşkenê heqê prosesanê zor û zehmetan ra bêrê û ser bikewê. Eke kurdî yewbînan ra bêbextîye nêkerê hînî ma do prosesanê xiraban peyê xo de verdenê. Labelê meseleya ma ya yewîye estê. Na dewa dewaya pêro kurdan a. Coka ganî kurdî namusê xo nêdê malanê dinya.''