Fotografê îşkenceyê dewleta tirke

Osman Şîban dima ke hetê leşkeran ra ame destbendkerdene helîkopterî ra erzîya war û nika zî servisê ciewnîyayîşê giranî de yo. Îşkenceyê vera Osman Şîbanî bi fotografan ame qeydkerdene.

Qezaya Şaxî ya Wanî de 11ê êlule de babîyê 7 domanan Servet Turgut (55) û babîyê 8 domanan Osman Şîban (50) hetê leşkeran ra ameybî destbendkerdene. Dima leşkeran wird hemwelatîyî helîkopterî ra eştî war. Hemwelatîyî wedarîyabi nêweşxane ke rewşa weşîye yê Turgut hema zî giran a û Osman Şîban zî servîsê ciewnîyayîşê giranî de yo. Keyeyê di birîndaran verê nêweşxaneyî de vindenê.

Çim û rîyê Şîbanî masayî û îşkence ra semed vîrê ey şino û yeno. Şîban seba ke hîşê xo ser o nîyo nêzanîyeno ke serebût senî qewimîya. Îşkenceyê vera Osman Şîbanî bi fotografan ame qeydkerdene.

Dîya zanayene ke Servet Turgut helîkoterî ra erzîyayo war. Raporê Turgutî de nusîyeno ke 'berzî ra ginayo war.' Yeno taxmînkerdene ke nê raporî hetê leşkeran ra ameyî amadekerdene.

Goreyê şahîdan û Wekîlê HDPyî yê Wanî Murat Sarisaçî hemwelatîyî hetê leşkeran ra helîkopterî ra erzîyayî war.

Sarisaçî vat: ''Turgut û Osman wexto ke axpînanê xo de xebitîyayêne leşkeran bi zorî ê nişnayî helîkopterî û 2 rojan înan ra xeberêke nêameye girewtene. Goreyê şahîdan wird kesî zî helîkopterî ra erzîyayî war. Wird kesî zî hetê leşkeran ra visîyenê nê halî.''

Rapor de nuseno ke wird çim û goşan zerar dîyê, gonîye binê damaran da bîye wişk û çermeyê bedenî tira qerifîyayî.