HDP: Ma do mewzîyanê xoverdayîşî cameverdê

Hemserekanê Pêroyî yê HDPyî Pervîne Buldan û Mîthat Sancarî vera darbeya hukmatî eşkerayîyêke daye. Hemserekan ard ziwan ke ê do qet mewzîyêk cameverdê û semedê pîlêrkerdişê têkoşînî veng da.

Hemsereka Kongreya Komelê Demokratîkî (KCD) û Wekîla Partîya Demokratîke ya Şaran (HDP) ya Colemêrgî Leyla Guven, û Wekîlê HDPyî yê Amedî Musa Farisogullariyî û Wekîlê CHPyî Enîs Berberogluyî yê ke wekîlîyîyê înan ameyî destsernayene dima ra cade ameybî tepiştene.

Hemserekanê Pêroyî yê Partîya Demokratîke ya Şaran (HDP) Pervîne Buldan û Mîthat Sancarî derheqê babete de merkezê pêroyî yê partîya xo de  kombîyayîşê çapemenîye kerd.

Îradeyê şarê kurdî yeno hedefgirewtene

Pervîne Buldan vist vîrî ke hukmat çîyo ke weçînayîş de nêeşka bifîno dest bizor û zextî wazeno bifîno xo dest û vat: ''Darbeya vizêr sey derbeyanê bînan ê îqtîdarî yo ke pê nînan wazenê ke payra bimanê. Tepiştişê Leyla Guvene û Musa Farisogullari darbeya vera îradeyê şarê Colemêrgî, Amedî û şarê kurdî ya. Mewzîyê ke ma bi keda pîle viste dest ma do bipawê. Rixmê heme hêrişanê înan ma do mewzîyanê xo cameverdê. Roje roja yewbîyayîş û pîlkerdişê têkoşînî ya.''

Ma blokê demokrasîyî ronê

Mîtat Sancarî zî bale ante polîtîkaya hêrişkare ya hukmatî ser, darbeyê înanê  bînî yê ke vera îradayê şarî ameyî kerdene vistî vîrî û nê vatî: ''Hukmat bi nê hêrişan wazeno şarî bitersno û bikero bêîrade. Êyê ke vanê qey şexsê Leyla Guvene û Musa Farisogullari de kurdan rê çok danê ronayene, zaf xeletîyêne. Kurdî rixmê heme hêrişan do çirey verê înan de milê xo çewt nêkerê û do tim sereberz xover bidê ke tewr peynî de ser bikewê. Hetê bînî ra bi Enis Berberogluyî zî ame waştenê îradeyê şarê Îstanbulî û Tirkîya bêro binpaykerdene. Coka ma vanê na darbeya vera îradeyê şaran a. Sey HDPyî paştîya ma hêzê ma ra, sere de zî şarê kurdî ra pêt a. Ganî vera hêrişanê îqtîdarî şarî yew bî û têkoşîn bikerê ke faşîzmî bidê war. Ma xo ra dokumentê xo yê tewirî de zî çend roje verî seba têkoşînê hemparî veng dabi. Nika ma newe ra veng danê. Bêrê ma pêro pîya vera hêrişan xover bidê û tewr vernî de vera darbe yew blokê demokrasîyî ronê. Bêrê ma pêro pîya têkoşînê haştîye bikerê pîlêr. Ma sey HDP her qeyde berpirsîyarîye genê xo ser. Eke şarî hêzê xo bikerê yew û pîya têkoşîn bikerê eşkenê ser bikewê .''