Hemserekê HDP’yî: Ganî tecrîd cade bêro wedaritene!

Parlamenteranê HDP’yî waşt ke Kuçeyê Îstîklalî de vera tecrîdî rayraşîyayîş bikerê, la polîsan verê înan girewt. Hemserekanê HDP’yî ard ziwan ke ganî tecrîd cade bêro wedaritene û vat, “Ma do tawîz medê”

Hemserekê Pêroyî yê HDP’yî Pervîn Buldane û Sezaî Temellî û parlamenterê HDP'yî seba ke paştî bidê hemsereka KCD’yî û parlamentera HDP’yî Leyla Guven a ke verê tecrîdkerdişê Rayberê Şarê Kurdî Abdullah Ocalanî 96 rojî yo grevê vêşanîye de ya, waşt Meydanê Taksîmî heta Galatasara ray ra şorê. Labêlê polîsan verê înan girewt.

HDP’yîyan verê rayraşîyayîşî Taksîm Hîll Otelî de ameyî têhet, êlegê ke ser o nuşteyê “Wa tecrîd bêro wedaritene, biciwîyo Leyla” dayo xo ra  û seba ke dest bi rayraşîyayîşî bikerê vejîyayî bi teber. Labêlê verê Otelî de polîsan rayîrê înan birna. Amîrê polîsan HDP’yîyan ra vat ke ê destûr nêdanê rayraşîyayîşê înan û vat, “Tebaxe 2018’î ra nata ma nêverdanê kes rayraşîyayîş bikero. Eke ma destûr bidê şima, o taw ê bînan rê eyb beno.”

Serokwezîrê Meclîsî yê HDP'yî û parlamenterê Mêrdînî Mîthat Sancarî ard ziwan ke,  çarçewaya heqanê qanûnê bingeyênî de ê wazenê ke rayraşîyayîş bikerê. HDP’yîyan ard vîrî amîrê polîsan ke Serokkomar Tayyîp Erdogan vizêrî tewrê merasîmê bingeakerdişê Merkezê Kulturî yê Ataturkî bi û Kuçeyê Îstîklalî de ray ra şi û sîmîtî şarî ra vila kerdî. Têvernayîşê mabênê HDP’yîyan û amîrê polîsan demêko derg dewam kerd.

GANÎ TECRÎD CADE BÊRO WEDARITENE

Hemserekê Pêroyî yê HDP’yî Sezaî Temellî eşkerayêk vat, “Ma wazenîme tecrîd cade bêro wedaritene. Seba ke hemparebîyayîşê têkoşînê Leyla Guvene ma tîya yê. No têkoşîn seba haştî, têduştî û azadîya pêroyê Tirkîye vejîyayo meydan û waştişêko biheq o. Heqê her hukumwerî yo ke keye û avûkatanê xo bivîno. Bêhuqûqîyêda gird a ke Birêz Ocalan nê heqê xo ra ameyo visnayene. Eke şima wazenê fotografê tecrîdê Îmralîyî bivînê,  o fotograf no yo. No fotograf ewro nîşanê şima kerdo. Na rewşêka ma ewro Meydanê Taksîmî de dîya, na bêqanunî û qanun nêşinasnayîşê înan o. Tecrîd no bi xo yo. Leyla Guvene 96 rojî yo cehd kenê ke nê  nîşanê şima bida.”

MA  HETA EWERO TAWÎZ NÊDAYO DO MEDÊ

Hemsereka Pêroyî yê HDP’yî Pervîn Buldane zî vat, “Seba wedaritişê tecrîdî û Leyla û hevalê ma yê ke hepixaneyan de yê biciwîyê, ma waşt ke bale biancê serê na babete. Wezîrê Karê Zereyî bi rengêkê nêheqîye verê parlamenteran girewt. Merdimbîyayîş o yo ke verê kişîyayîşî girewtiş o. Êyê ke bi nê şeklî welatî  îdarê kenê ganî bizanê ke ma do nê waştişanê biheq û muşrûyan her ca de biyarê ziwan. 40 serrî yo ma têkoşîn kenê. Ma Wezîrê Karê Zereyî ra têkoşînê demokrasî û azadî nêmusayîme. Ma cara tawîz prensîpanê ra nêdanîme. Seba ke azadî û edalet bêro nê welatî ma her tewir bedel dayo.”

HDP'yî qiseykerdişan ra dima dest bi çalakîya ronîştişî kerde. Wextê çalakîye de bi rayîrê telefonî Leyla Guvene Pervîn Buldane reyde qisey kerd û derheqê çalakîye de zanayîşî dayî ci.