Hewteyêk 93 hezar vilawekê serê faşîzmê tirkî ameyî vilakerdene
Komêka aktîvîstan ê almanan û dezgehanê kurdîstanijan ê Almanya mîyanê hewteyêkî de bi serrnameyê 'Faşîzmê tirkan rê nê' 93 hezar vilawekî vila kerdî.
Seba ke bale biancê hêrişanê îşxalî yê dewleta tirke yê vera Herêmanê Pawitişî yê Medya Kampanyaya 'Bi 1.5 mîlyon reyî faşîzmê tirkan rê ney' ê dezgehanê kurdan ê Almanya û aktîvîstanê almanan dewam kena.
Kampanya rayberîya Konfederasyonê Komelanê Kurdîstanijan ê Almanya (KON-MED), Yewîya Cinîyan ê Kurdan a Almanya (YJK-E), Women Defend Rojava û RiseUp4Rojava de yena caardene.
Vervatoxa Kampanyaya Women Defend Rojava Tanya Berger ard ziwan ke ê armanc kenê ke derheqê hêrişanê dewleta tirke de rayaumûmîye agahdar bikerê. Tanya vat: ''Nê hêrişî nênê qebulkerdene. Ma do nika ra pey zî vejîyê meydanan û nêrazîbîyayîşê xo bimojnê.''
Vervatoxa Kampanyaya Riseup4Rojava Lisa Schelm zî venga hêzanê demokratîkan da ke vera hêrişanê Tirkîya têbigêrê. Lisa vat: ''Ma do pê têkoşînê xo yê hemparî, faşîzmî çin bikerê.''
Çarçewa kampanya de hewteyêk 93 hezar vilawekê serê faşîzmê tirkî ameyî vilakerdene.
