Hozate: AKP-MHP koalîsyonêko kontragerîla yo

Hemsereka Konseya Rayberdişî ya KCKyî Besê Hozat: Îqtîdarê AKP-MHPyî  koalîsyonêko kontragerîla yo. Armancê înan qirkerdişê kurdan o. 

Hemsereka Konseya Rayberdişî ya KCKyî Besê Hozat derheqê babetanê rojdemî de cewab da persanê ANFyî yê.

Qiseykerdişê Besê Hozat ra beşêk wina yo:

''Ez bi wesîleya serrgêra 22. ya komloyê mîyanneteweyî ya 15ê sibate komplogeran şermezar kena û şehîdanê azadîye û şorişî bi heskerdiş, rêzdarî û mînetdarî yad kena. Komplo 22 serr ê ke bi tecrîdê Îmraliyî dewam keno. Tecrîdê Rayber Apoyî netîceyêkê planê qirkerdişî yê vera şarê kurdan o.Tecrîd polîtîkayêka qirkerdişî yo. Her keso ke wazeno bi hawayêkê merdimî, rûmetênî û azadî biciwîyo ganî vera tecrîdî têkoşîn bikerê. No têkoşîn wezîfeyê merdimbîyayîş o. Ez venga şarê kurdî, cinîyan û terefgîranê demokrasîyî û azadîye dana ke bi ferasetê rijnayîşê faşîzmî, azadkerdişê Rayber Apoyî wurzê payan ser û wayîrê ameyoxê xo bivejîyê.

Îqtîdarê AKP-MHPyî hînî tewr meşrû nîyo. Hînî ê prosesê rijîyayîşî de yê.  Weçînayîşê adare û hezîranî de no çi zaf baş ame dîyene. Îqtîdaro faşîst ê AKP-MHPyî seba ke payan ser bimano îradeyê demokratîkî yê şaran çin keno, hêrişê xo yê qirkerdişî zêde keno. No îqtîdaro faşîst xîret keno ke bi rayîrê şerî payan ser bimano. Îqtîdarê AKP-MHPyî koalîsyonêko kontra-gerîla yo, gladyo yo. Armancê ci no yo ke planê qirkerdişî yê ses serr ê verê kurdan yeno kerdene ano ca. No hêzê şerî zere û teber de bi şerî û bi qirkerdişan xîret keno ke îqtîdarê xo dewam bikero. Yew meşrûtîyetê nê îqtîdarî nêmend. 

Mesela yewîne ya Tirkîya mesela têkoşînê komelkî ya yewbîyaye û muxalefetê demokratîkî ya. Îqtîdarê AKP-MHPyî naye ra hêz gêno û payan ser maneno. Dişmenîya kurdan ser o neteperwerîye xo awan keno û bi nê hawayî estbîyayîşê xo derg keno.Têkoşînê vera îqtîdarê kontrayî têna mesela kurdan û hêzanê demokrasîyî ney mesela pêro Tirkîya ya. Her kes ganî vera nê îqtîdarî têkoşîn bikero.

Îqtîdaro faşîst ê AKP-MHPyî tesîrê têkoşînê cinîyan ê serê komelî ra zaf terseno. Semedê zêdîyayîşê şîdetê vera cinîyan nê tersî yo. Têkoşîn hîşmendîye xurt keno. Vera şîdetê nê îqtîdarî yewî û rêxistinbîyayîşê cinîyan zaf girîng ê. Cinîyî çen rêxistin bibê, paştî bidê yewbînan û têkoşînêkê hemparî bikerê o tewir do netîce bigêrê.

Xebatê seba ziwan û kulturî zaf girîng ê. Ganî merdim asta seferberîye de nê xebatan bikerê. Şarê ma ganî bi ziwanê xo qisey bikero, ziwanê xo bimusno domananê xo. Xebatê seba yewîya neteweyî zaf stratejîk û manadar ê. Menganê peyênan de Vakurê Kurdîstanî de seba yewîya neteweyîye xebatêka zaf ercayeye û hîra ameye kerdene. Vakurê Kurdîstanî merkezê têkoşînê demokrasîyî û azadîye yo. Dewleta tirke dişmena verêne ya kurdan o. Zaf manadar o ke yewîya neteweyî ya kurdan Vakurê Kurdîstanî de aver şina.Seba yewîya neteweyîye ma amade yê ke venga şarê xo bikerê. Tarîx hînî yewîya neteweyîye seba şarê ma ferz kerd. Nê prosesê eşkerakerdişê çarenusî de yewîye wezîfeyêk a, mecburî ya û fermanê tarîxî ya. Ganî şarê ma seba têkoşînê yewîye xo amade bikero. Ganî şarê ma her çi partîyan ra hêvî nêkero."