Karayilan: Ma do qilêkê Kurdistanî zî dewleta Tirkî rê nêverdê

Karayilanî vat do qilêkê Kurdistanî zî dewleta Tirkî rê nêverdê û vat, Beno ke bica bibê, labelê do bedelê ci bide. Dişmen çabo ma ûca yê. Ma do mîyanê yewbînan de bê, ma do tu cayêk ra fek vera nêdê û nêşirê yewna cayî.”

Fermandarê Qerargehê Merkezê Pawitişê Şarî (MPŞ) Mûrat Karayilanî derheqê hêrişanê îşxalî yê dewleta Tirkî yê Başûrê Kurdistanî de û xoverdayîşê gerîlayan ê hemverê îşxalkarîye de ANF’yî rê qisey kerd.

Karayilanî destpêk de bale ante serê xoverdayîşê grevanê vêşanîye û rojeyê mergî yê ke hemverê tecrîdkerdişê Rayberê Şarê Kurdî Abdullah Ocalanî ameyî kerdene û vat ke netîceyê nê xoverdayîşî, çalakîyanê fedaîyan û mucadeleyê mayanê mexmelsipîyan de dêsê tecrîdî yê Îmraliyî ameyê rijnayene. Karayilanî vat, “Beno ke bi temamî peynîya tecrîdî nêameya, goreyê prosesanê polîtîkan beno ke bêro vurnayene, labelê dêsê tecrîdê mutleqî ame rijnayene.

Rayber Apo seba dewleta Tirkî bianco sere zemînê demokratîkî xeylî cehd keno. Na babete de bi waştiş û sebir mucadele keno. Reyna ame dîyene ke o nê mucadeleyê xo yê seba çareserîye bi îrade û qerardarîyêka pîle domneno.”

Konseptê Şerî yo Newe: Vakur de Bicaardişê ‘Planê Binfînayîşî’, Başûr û Rojawan de Îşxalkarî

Fermandaro pêroyî yê MPŞ’yî Karayilanî bale ante serê konseptê neweyî yê dewleta Tirkî yê hêrişî û vat, “Dewleta Tirkî seba ke şer de û hêrişanê xo yê verê nikayî de bi ser nêkewte, dest bi konseptêkê şerî yê neweyî kerd. Cewherê konseptê neweyî wina yo; Vakurê Kurdistanî de bicaardişê ‘planê binfînayîşî’, Başûr û Rojawanê Kurdistanî de zî temamkerdişê teşebusê îşxalkarîye. Vana qey a do problemê Kurd û Kurdistanî yê se serrî bi nê hawayî hal bikero. Yanî wazena bi sîyasetê qirkerdişî problemî raste ra wedaro.”

Karayilanî vat, çîyo ke sîyasetmedarê Başûrê Kurdistanî fam nêkenê yan zî nêwazenê fam bikerê no konseptê dewleta Tirkî yon ewe yo û vat, “Dewleta Tirkî çarçewaya nê konseptî de destpêkê serra 2018’î ra kena ken ê plane xo yê îşxalî bero sere. La dewleta Tirkî xetemîyaya, Efrîn de, Lêlîkan de xetemîyaya û seba ke bieşko estbîyayîşê xo yê Lêlîkanî bipawo dest bi îşxalê wareyanê Xakurkê kerd. Ganî tena PKK nê, heme hêzê Kurdistanî hemverê nê îşxalî de vejîyê. Gama ke ma nê vanê, ma nêvanê ke wa bêrê hetkarî bidê ma. Nê! Nika Başûrê Kurdistanî de teşebusêkê îşxalî esto, naye ra ma nê vanê.”

Dewleta Tirkî Wazena Herêmêkê Tamponî Awan Bikero

Fermandarê pêroyî yê MPŞ’yî Mûrat Karayilanî derheqê çarçewaya hêrişê îşxalî ya Xakurkê de zî qisey kerd û vat, “Ez wazena ke xusûsen vajî no hêriş teşebusêkê îşxalî yê mendeyî yo. Hêzê înan ê leşkerî û sîyasî yo nikayên qîm nêkeno ke temamê Başûrî îşxal bikerê. Labelê qe nêbo wazenê ke herêmêkê tampon awan bikerê. Bi nê hawayî wazenê ke Başûrî hîna bikerê qij û hîna asan kontrol bikero. Xora Tirkîya seba îşxalê Xakurkê NATO û Amerîka ra destûr girewto.

Eke ewro hemsencîya mabênê PKK’yî û dewleta Tirkî ra nêbo, sîstemo federe yê Başûrê Kurdistanî nêeşkeno rojêk dewam bikero. Wa no şaş fam nêbo. Helbet Başûr de zî bi desan serran seba heqan mucadele ame kerdene, bedelî ameyî dayene. La rastîyêka hemsencîya mabênê PKK’yî û dewleta Tirkî zî esta ke ganî bêro dîyene. Hêzê Başûrê Kurdistanî yê ke na hemsencîye ra îstîfade kenê nika estbîyayîşê xo yê federasyonî domnenê.“

Karayilanî derheqê bêvengî û bêxemîya hukmatê Başûrê Kurdistanî de vat, „Bêvengî û tewiro tersinok ke krîtîkêk zî nêkeno, teslîmîyet o. Eke ê nê tewirê xo bidomnê do dewleta Tirkî meşte xo biresno heta Hewlêr û bikero ke hesab biperso.“

MÎT’ê Başûrê Kurdistanî Tena Hemverê PKK’yî de Xebate Nêkeno

Karayilanî vat, “MÎT nika selahîyetdaranê Başûrê Kurdistanî goşdarî keno. Telefonanê înan goşdarî kenê û înan şopnenê. Ma na yewe rast nêvînenê. Dewleta Tirkî hêzêko îşxalkar o kiştox o. ma pêrune dî ke Efrîn de, Cizîre de se kerd. Çîyo tewr xirab zî dewleta Tirkî reyde hemkarî kenê, ge-ge îstîxbarat pare kenê. No seba menfaatanê ma yê neteweyîyan xeylî şaş o. seba ke ma bieşkê amacanê dewleta Tirkî yê Başûrê Kurdistanî vindarnê ganî ma qetîyen polîtîkayêka neteweyîye biafernê. Amacê dewleta Tirkî o yo ke mîyanê Kurdan de şer virazîyo. Bi na polîtîka wazena Kurdan perçe bikero. Ganî ma nêkewê dame.

‚Dişmen Ça Bo Ma Ûca yê; Dewleta Tirkî do Yew bi Yew Bedelê Nê Bido‘

Fermandaro pêroyî yê MPŞ’yî Mûrat Karayilanî derheqê xoverdayîşê gerîlayan ê Başûrê Kurdistanî yê hemverê îşxalê dewleta Tirkî de vat, „Ma gerîla yê. Beno ke dewleta Tirkî qilêk de bica bibo. No seba ma zihîfî nêya. Şekîfê de zî ma bi metod û hawayêk estê. Yanî ma ci ra nêvejênê. Dişmen ûca bo ma zî ûca yê. Ma dî ke mîyanê serrêk de înan Lêlîkan de senî bedel da. Înan serrêk mîyan de xeylî kişteyî dayî, la şarê Tirkî ra nimitî. Nika qilî kerdê vêşî. La panc-şeş qilê bîn ê. Vînîyê înan zî do hîna bibê zêde. Xoverdayîş do hîna bibo pîl, bi hawayêkê tarîxîyî do dewam bikero. Ma do qilêkê Kurdistanî zî dewleta Tirkî rê nêverdê. Bêguman ma do xover bidê. Xoverdayîşê seba azadîye û demokrasîyî wezîfeyê ma yo. Domanê nê şarî, keyna û lajê nê şarî do bi nê fehmî xover bidê.“