KCK: Wirzê payan ser!

KCK’yî derheqê xespkerdişê şaredarîyanê Amed, Wan û Mêrdînî yê HDP’yî de eşkerayîyêk daye û veng da ke wa Kurdî û şarê Tirkîya vera îqtîdarê faşîstî wirzê payan ser.

Hemserekîya Konseya Rayberdişî ya KCK’yî eşkerayîya nuştekîye daye û Kurdan û şaranê Tirkîya ra waşt wa vera faşîzêmê AKP-MHP’yî bêveng memanê û wirzê payan ser.

Eşkerayîye ra tayî cayî wina yê: ‘’ Hêrişê ke vera hêzanê demokrasî û şarê Kurdî yenê rayraberdene do ewro ra tepîya zî bi zêdbîyayîş dewam bikerê. Hêrişê ke vera Vakur, Başûr û  Rojawanê Kurdistanî û Vakurê Sûrîye yenê viraştene, nê hêrişî zî bi heman amancî yenê viraştene. Tena yew sebebê nê hêrişan esto, no zî eciqnayîşê hêzanê demokrasî û temamkerdişê qirkerdişê Kurdan o. No hêrişê vera îradeyê şarê Kurdî yo. Her Kurdo ke wayîr nasname, kultur û azadîya xo vejîyeno hedefê sîstemê qirkerdişî de yo. Tirkîya de demokrasî û azadîye çîn ê.

Ganî vera nê hêrişî mucadele bêro girdkerdene. Sere de gerîla ganî her  ca de mucadele bêro berzkerdene.Ciwanî, cinîyî û şarê Kurdî ganî kuçeyan û mehleyan biaçarnê cayê serhildanî. Kêna û lajê Kurdanî wa verê xo bidê koyan azadan û cewabê îqtîdarê faşîstî bidê. Reyna heme partîyê sîyasîyî, têgêrayîşî û hêzê Kurdan fikrê înan senî beno wa bibo ganî hempar tê bigêrê û vera qirkerdoxan tewirê xo ramojnê.

Nê hêrişî tena vera HDP’yî nê vera heme şarê Kurdî yo. Reyna hêzê demokrasî yê Tirkîya zî ganî vera nê hêrişan bêveng memanê. Kam ke xo ra vano demokrat ganî vera nê hêrişan vengê xo berz bikero. Partîyê sîyasîyî, dezgehê mîyanneteweyîyî û heme dewlete ke vera nê hêrişan tewir ranêmojna, hemkarê nê hêrişan ê. Ganî Neteweyê Yewbîyayeyî û Yewîya Ewropa û heme dezgehê mîyanneteweyîyî, heme hêzê sîyasî yê ke xo demokrat vînenê û heme hêzê demokratîkî ganî vera nê hêrişanê vera îradeyê şarê Kurdî tewirê xo ramojnê.  Şarê Kurdî û hêzê demokrasî yê Rojakewtena Mîyanêne binê hêrişê giran de yê. Ganî çar parçeyanê Kurdistanî û teberê welatî şarê Kurdî wirzo payan ser mucadeleyî bêmabên berz bikero.’’