Kesê ke erdlerzê Xarpêtî de merdî hûmara înan resaye 41

Goreyê zanayîşanê peyênan hûmara merdeyanê erdlerzê Xarpêtî bîye 41. Hetkarîya HDPyî zî hetê polîst û leşkeran ra yena astengkerdene.

Xabatê cigerayîş û xelisnayîşî yê ke badê erdlerzê Xartpêtî yo ke bi girdîya 6.8 de qewimîya ameyî destpêkerdene dewam kenê. Goreyê zanayîşanê peyênan kesêk binê enkazî de nêmend û hûmara peyêne ya merdayan resaye 41 û 128 kesî weş binê enkazî ra ameyî vetene.

Serekîya Îdareyê Rewşa Lezebezîye û Afete (AFAD) da zanayene ke 607 kesanê ke muracatê nêweşxaneyan kerd înan 515 kesî nêweşxaneyan ra vejîyayî. AFADî vat Meletî û Xarpêt de pêro pîya 2 hezar 945 bînayî ameyî etudkerdene. 87 bînayî rijîyayî, hezar 287 bînayan de xesaro giran esto, 56 bînayan de şenik  û 876 bînayan de zî tay xesar esto. 12 bînayî ameyî tesbîtkerdene ke ganî cade bêrê rijnayene. 627 bînayî zî bê xesarê.

Hetê bînî ra seba ke destûr nêdîyenê hetkarîya HDPyî wekîlanê ci babete kirişte rojdemê meclîsî. Wekîlanê HDPyî Nurane Îmîr û Murat Çepnî vat rixmo ke verê erdlerzî xaylêk hîşyarî ameyî kerdene qey vera erdlerzî tedbîrî nêameyî girwtene û qey destûr nêdîyenê hetkarîya şaredarîyanê HDPyî.