Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê Îşkenceyî ya Konseya Ewropa (CPT) de yena kerdene.

Nobete hewteyê 467. de pê koma Bonnî ya Almanya dewam kena. Kome de kurdîstanijî Fadîle Ehmed, Fatma Mallanasan, Necmettîn Kaçar û Gulay Kaçar ca gênê.

Fadîle Ehmed nameyê kome ser o qisey kerd û vat: ''Ma pê na çalakîye wazenê Ewropa paştî nêda kerdişanê xiraban ê vera Rayberîye û polîtîkaya qirkerdişî ya vera kurdan. Çareserîya meseleya kurdan ra tek muxatab Rayber Abdullah Ocalan o. ''

Ehmede peynî de bale ante hêrişanê îşxalî yê vera Herêmanê Pawitişî yê Medya ser û vat: ''Nê prosesî de ganî pêro kurdî wayîrê Rayber Apoyî û têkoşînê tarîxî yê gerîlayan vejîyê. Seba caardişê yewîya neteweyîye ganî ma tim tedaya partîya kurdan bikerê.''

Warê Nobeta Azadîye de çalakîya roniştişî ya 4 hewteyan zî dewam kena.