Şaristanê Montpellierî yê Fransa de hêrişê îşxalî yê dewleta tirke yê vera Kampa Mexmûrî û vera Zap, Metîna, Avaşînî pê çalakîyêka rayraşîyayîşî ameyî şermezarkerdene. Çalakîye hetê Merkezê Komelê Demokratîkî yê Kurdan (NCDK) û Komunê Cinîyan ê Delale amed ra ameye kerdene.

Çalakîye de sloganê sey 'kiştox Erdogan', 'Terorîste Tirkîya', 'Ocalanî rê Azadîye', 'Biciwîyo xoverdayîşê gerîlayan' ameyî vatene. Hemserekê NCDKyî Cevat Guneşî çalakîye de hetkarîya PDKyî ya bi dewleta tirke şermezar kerde û venga pêro kurdan da ke vera PDKyî tewirêk bigêrê.

Endama Kolektîfê Paştdayîşî yê Şarê Kurdî Belfîne zî venga warê mîyanneteweyî da ke wa PKK lîsteya terorî ra vejo û vera hêrişanê dewleta tirke tewirêk bimojno.