Konfederasyonê Cimatanê Kurdistanijan ê Ewropa (KON-MED) û Têgêrayîşê Cinyan ê Kurdan ê Ewropa (TJK-E), vera îşxalkarîya dewleta Tirkî ya Başûrê Kurdistanî seba rayraşîyayîşê  29'ê Hezîrane vengdayîşê tewrbîyayîşî kerd.

Eşkerayîya KON-MED’ û TJK-E wina ya:

“Dewleta Tirkî wazena Başûrê Kurdistanî îşxal bikera, rayberîya PDK’yî zî tewrê nê polîtîkayanê xo kena û bi paştdayîşê PDK’yî hêrişanê xo zêde kena. PDK’yî xeylî cayanê stratejîkan ra pêşmergeyê xo antî, mewzîyê xo artêşa Tirkî ya îşxalkare rê caverdayî û bi nê hawayî hem cesaret dana artêşa Tirkî ya îşxalkare hem zî seba kiştişê şarê sîvîlî vernîya hêrişan akena. 

Ganî şarê ma yê Başûrê Kurdistanî, yê heme parçeyan û teberê welatî bi vinetişêkê qerardarî têkoşîn bikerê, plananê îşxalkarîya dewleta Tirkî bin bikerê. Ganî kayê hewn û xeyalê se serran ê dewleta Tirkî bêro binkerdene. Ganî ma nê prosesê tarîxkî de firsend û destkewtîyanê xo bivurnayê azadîyêka daîmîye.

Vera hêriş û îşxalkarîye dewleta Tirkî yê Başûrê Kurdistanî sere de Almanya de û bajaranê Strasbourgî yê Fransa de, xeylî welatanê Ewrpa de 29’ê Hezîrane de çalakîyî do bêrê viraştene. Ma vengdayîş kenê ke xurtir tewrê nê çalakîyan bibê. Şarê Başûrî teyna nîyo. Şarê Kurdî her çar parçayanê Kurdistanî de şarê Başûrî reyde yo.”