Kurdîstanijan û dostanê înan xeylêk şaristananê dinya de hêrişê îşxalî yê vera Herêmanê Pawitişî yê Medya çalakîyî kerdî.

Peytextê Almanya Berlin de kurdîstanijan û dostanê înan pê çalakîyêke hêrişê AKP-MHPyî yê vera Herêmanê Pawitişî yê Medya protesto kerdî. Çalakîye de ame vatene ke binkewtişê Zap û Garê ra dima dewleta tirke ya îşxalkere narey verê xo da Herêmanê Pawitişî yê Medya. Çalakîye de sloganê sey 'Biciwîyo Serek Apo', 'Bêserek cuye nêbena', 'Biciwîyo xoverdayîşê gerîlayan ameyî vatene.

Şaristanê Leipzigî yê Almanya de çalakîya verê hêrişanê îşxalî de eşkeryaîya KON-MEDî ameye wendene. Nameyê FED-KURDî ser o Menderes Canbekî qisey kerd û îfade kerd ke Amerîka hetêkî ra Qirkerdişê Armenîyan şinasna hetê bînî ra zî destûr da qirkerdişê kurdan.  Çalakîye pê sloganan qedîyaye.

Oldenburg de zî hêrişê vera Herêmanê Pawitişî yê Medya, hêrişê vera Şingalî û hêrişê Dîfa El Wetenî yê vera Qamişloyî bi çalakîyêka rayraşîyayîşî ameyî protestokerdene. Çalakîye de fotografê Sînan Dêrsimî ameyî kiriştene û sloganî ameyî vatene.

Şaristanê Hannoverî yê Almanya de rayberîya ciwanan de hêrişê îşxalî ameyî şermezarkerdene. Çalakîye de pankarta bi nuşteyê 'Dewleta tirke ya îşxalkere wa destê xo Kurdîstanî ra bianca' ameye akerdene.

Şaristanê Limassolî yê Qibrisî de kurdîstanijan û dostanê înan pê çalakîyêke hêrişê îşxalî yê vera Başûrê Kurdîstanî şermezar kerdî. Çalakîye de Sînan Dêrsim zî ame yadkerdene. Sîyasetmedarê kurdî Lezgîn Serhatî çalakîye de qisey kerd û da zanayene ke ganî hêzê mîyanneteweyî vera nê hêrişan bêveng nêmanê.

Banlîyoyê Drancyî yê Parisî yê Fransa de rayberîya aktîvîstanê TCŞyî de hêrişî ameyî protestokerdene. Ciwanan pankarta bi nuşteyê 'Hêrişê faşîstî yê tirkan ê vera Metîna vindarnê' akerde û sloganê bi kurdkî û fransizkî vatî. Çalakîye de bale ameye antene azadîya Rayberê Şarê Kurdî Abdullah Ocalanî ser.