Marsilya û Stuttgart de adirê Newroze ame tafînayene

Marsilya û Stuttgart de bi slogana 'Ma wayîrê Rayberê Şarê Kurdî Abdullah Ocalanî vejîyenê' rayraşîyayîşê meşaleyinî yê Newroze ameyî kerdene.

Ciwananê kurdan û enternasyonalîstan bajarê Marsilya yê Fransa û bajarê Stuttgartî yê Almanya de rayraşîyayîşê meşaleyinî yê Newroze organîze kerdî.

Marsilya de badê rayraşîyayşo ke TCŞyî organîze kerd, mîtîngêk ame kerdene. Şexsê Mazlûm Dogan û Zekîye Alkan de şehîdê Newroze ameyî yadkerdene û  ame vatene ke ê do rêça şehîdanê xo de têkoşînî pîl bikerê. Dima ra adirê Newroze ame tafînayene û govende ameye girewtene.

Stuttgart de zî bi vengdayîşê Teko-JINî bi şîarê 'Bi ruhê Ronahî û Bêrîvane, Rayber Apoyî rê azadîye'  rayraşîyayîş û mîtîngêk ameyî kerdene. Sara Coşkuna ke mîtîng de qisey kerd vat: ''Newroz vera zordarîye yew ganîbîyayîş o. Meşaleyê xoverdayîşî ke pê Neweroze dest pêkerd ewro Têgêrayîşê Azadîye de dewam keno.''

Ciwanan tecrîdê serê Rayberê Şarê Kurdî Abdullah Ocalanî şermezar kerd û vat heta ke xeberêk bêro girewtene çalakîyê înan do dewam bikerê.