Mayê xoverdayoxan: Edaleto ke nameyê to de yo bica bîyare!

Mayanê ke çalakîya xo Meclîsî ra berde Merkezê Pêroyî yê HDP’yî, vat ke heta waştişê domananê înan bêrê biccardene ê do Enqere de bimanê. Mayan ra Afîye Bîtmene veng da Wezaretê Edaletî û vat “edaleto ke nameyê to de yo bica bîyare.”

Mayê xoverdayoxanê ke çalakîya xo Meclîsî ra berde Merkezê Pêroyî yê HDP’yî vat ke heta waştişê domananê înanê ke grevê vêşanîye de yê bêrê biccardene ê do Enqere de bimanê.

Mayan ra Nûran Tarlaka ke vat heta waştişê domananê înan bêrê qebûlkerdene ê do Enqere de bimanê. Tarlake vat, “Seba domananê ma hendî sanîyeyî zî muhîm ê. Ûca vindertiş, hendî wijdanê ma bar nêdano ke ma bi saetan vinderê. Seba domananê xo eke lazim bo ma do sazî bi sazîye bigêrê. Seba ke vengê ma bêro şinawitene. Destê ma ra çi bêro ma do bikerê.

‘Domanê Ma Helênê’

Maya Tarik Aliciyî, yo ke Zîndanê Kapsûtî yê Balikesîrî de grevê vêşanîye de yo, Ayşe Alici vat, “Ma seba veng bidê vengê lajê xo û embazanê ci ameyî. Verê çimanê ma de domanê ma helînê. Tu game nêerzîyena. Hendî ma nêeşkenê vinderê. Wezîrê Edaletî eşkerayî daye la hewna zî pêvînayîşî nêameyê organîzkerdene.

‘Ê Veng Nêbenê Goşanê Xo’

Waya Berîvan Bîtmena ke grevê vêşanîye de ya Afîye Bîtmene vat “Ê vengê ma şinawenê, la peygoş kenê. Ê mudaxele kenê, derb kenê ma erd de kaş kenê. Beno ke ê ma nêgêrê Meclîsî, destbend bikerê û derb bidê ma ro. La se beno wa bibo ma qerar dabi ke şirê Enqere. Gama ma ameyî tîya zî ma çewî ra nêvat ma do Meclîsî de ronişê.”

‘Wa Edaleto ke nameyê ci tede yo tam bêro bicaardene’

Bîtmene newe ra veng da Wezaretê Edaletî û nê vatî: “Senî ke ê hemeyê dinya rê û hemeyê Tirkîya rê eşkerayîya ‘qedexe wedarîya’ daye. Wa nameyê edaletî yo ke te de yo tam bica bîyaro. Ma nêwazenê ke zîndanan de bedele giranî bêrê dayene. Wa zerrîya çewî nêvêşo. Hewna ke ma bedelê giranî nêdayê, wa vengê ma bêro şinawitene. Hendî deqayî zî seba ma muhîm ê.”