Ciwano kurd o efrînij Amed Ahmed şaristanê Keleve yê Almanya de bii hawayêkê keyfî tepişîyabi û dima ke hucreyê ci de şewat vejîya Ahmed birîndar bibi. Ahmed teşrîna verêne ya 2018î de dinyaya xo bedilnaye. Keye û avûkatanê Ahmedî eşkera kerd ke polîsan dosyaya destbendkerdişî ya Ahmedî esterita.

Mudirîya Asayîşî ya Eyaletê Vakurî Ren Vestfalya (NRW) zî îdîa kerd ke seba ke dewa ser o zaf wext vîyarto dosya bi hawayêkê 'otomatîkî' ameya esteritene. La Wezaretê Karanê Zereyî yê NRWyî bire dabi ke na dosya do nêra esteritene.

Keyeyê Ahmedî gerreyê polîsan kerd. Parlamenteranê Meclîsê NRWyî zî rexneyê giranî kerdî. Hetkarê Serekê Koma SPDyî Sven Wolfî vat esteritişê dosyaya orjînale înan qerqilnena. Wekîlê Partîya Keskan Stefan Engstfeldî serebût sey 'skandal' name kerd û vat: ''Ma hînî do nêeşkê xo biresnê dosyaya orjînale.''

Vervatoxê Komîsyonê Yewîya Demokaratan ê Xirîstîyanan (CDU) Oliver Kehrlî zî ard ziwan ke muxalafet teorîyanê komployî zêdîneno.

Temmuza 2018î de polîsanê NRWyî bi îdîaya ke Ahmedî Hamburg de dizdîye kerda o tepişt. Rixmo ke Ahmedî vat o qet nêşîyo Hamburgî û eleqeyê ci pê na sûcdarîya çin a polîsan û dozgerî goş nêda ci.

17ê êlula 2018î de hucreyê Ahmedî de şewat vejîya. Wexto ke Ahmed nêweşxane de koma de bi eşkera bibi ke Ahmed bêsûc o.Ahmed 5ê teşrîna verêne ya 2018î de dinyaya xo bedilnaye.