Qurbananê Qirkerdişê Feylî Şaristanê Stockholmî yê Swêdî de serrgêra 41. de bi merasîmêk ameyî yadkerdene. Merasîm Merkezê Komelê Demokratîkî yê Kurdan (NCDK) yê Stockholmî de ame kerdene.

Hemsereka KNKyî Zeynebe Murad merasim de qisey kerd û pare kerd ke kurdê Feylî bêrêxistin û pawitişî mendî û nika zî Îdareyê Başûrê Kurdîstanî înan nêpaweno. Zeynebe Murad venga pêro kurdan da ke wayîrê kurdanê Feylî vejîyê.

Temsîlkarê Rêxistina Kurdanê Feylî ya Bexdadî Mihemed Nurîyî zî ard ziwan ke ê sey kurdanê şîayan tim rastê qirkerdiş û zorbazîyan ameyî. Nurîyî da zanayene ke Kerkûk, Mûsil, Xaneqîn, Bexda, Besra, Îlam, Kirmaşan, Loristan û Tehran de bi temamî 2 mîlyon feylî estê û heta nika xeylêk Feylî kişîyayî, dîyayî vînîkerdene û herêma xo ra ameyî vetene.