Rêxistina HDPyî ya Çewlîgî: Dewanê elewîyan rê xizmet nêno kerdene

Rêxistina HDPyî ya Çewlîgî şaristan de xeylêk dewê elewîyan zîyaret kerdî û da zanayene ke seba ke elewî yê dewanê karerî rê xizmet nêno kerdene, rayîrê dewan nêvirazîyenê.

Wekîlê HDPyî yê Çewlîgî Erdal Aydemîrî şaristan de xeylêk dewê elewîyan zîyaret kerdbî Zîyaretî ra Aydemîrî eşkerayîyêke daye û pare kerd ke rayîrê dewan heta Karerî virazîyenê la sînorê Karerî ra dima nêvirazîyenê. Aydemîrî bale antbi ser ke seba ke nê dewî ê elewîyan ê, înan rê cîyakerî yena kerdene.

Eşkerayîya HDPyî ra dima Bînaya Îdareyê Taybetî ya Çewlîgî muxtarê dewanê Karerî baxçeyê xo de ardî pêser û îdîa kerd ke vatişê Aydemîrî raşt nîyê û ê xizmet benê dewanê elewîyan. 

Nîqaşan ra dima Rêxistina HDPyî ya Çewlîgî zî dewê elewîyan zîyaret kerdî û derheqê mesele de nê zanayîşî pare kerdî: ''Dewlete û îqtîdarî muxtarê dewanê Karerî ardî baxçeyê Bînaya Îdareyê Taybetî û bi zorî înan rê belgeyêk da îmzakerdene. La aslê xo de vatişê Bînaya Îdareyê Taybetî raşt nîyê. Pêro şarê ma zî naye zaneno. Ma zîyaretanê xo de tesbît kerd ke seba ke awa pake û awa kanalîzasyonî kewenê têmîyan tay kesî merdî, meseleyê awanîye estê, rayîrî nêameyî viraştene. Rayîrî heta Karerî virazîyenê la rayîrê Karerî nêvirazîyenê. Na cîyakerîye ra berî çîyêk nîya. Dewanê Karerî de ceyran vera birîyeno û Ocaxanê Weşîye de kêmîyê pîlî estê. Ma sey Rêxistina HDPyî şarê ma yê Karerî zîyaret kerdî. Ganî pêro partîyê sîyasîyî zî wina bikerê û goş bidê derdanê şarê Karerî. Ma sey HDP têna wazenê ke hewcedarîyê şarê Karerî cade bêrê peydakerdene.''