Rêxistinanê komelê sivîlî û partîyanê sîyasîyan ê Fransa binê sîwana Kolektîfê Paştdayîşê bi Kurdîstanî de seba ke PKK lîsteya terorî ra bêro vetene kampanyayêka wextderge daye destpêkerdene.

Kolektîfî derheqê kampanya de eşkerayîyêke daye û vist vîrî ke gulana 2002î de Yewîya Ewropa pê fermanê Amerîka PKK girewt mîyanê lîsteya terorî. Eşkerayîye wina dewam kena:

''PKKyî tim xoverdayîşê vera barbarîya dewleta tirke armanc kerd. PKK mîyanê kurdan ra yeno, wayîrê erjanê humanîstan o. Konseya Ewropa û Tirkîyaya ke endama NATOyî ya 1980an ra nata pê argumanê xo yê xapînayokî bi nameyê 'têkoşînê vera terorî' peymana Cenevre binpay kenê.

-Cakerdişê PKKyî mîyanê lîsteya terorî de yeno manaya Kurdîstan de bi hezaran tepişteyê sîyasî, îşkence, muhakemekerdişê neheqî, tecawuz, qirkerdişê nimiteyî, faîl-î meçhulî, remnayîş, mîrasê talankerdeyî, şerê neheqî, bombarduman, îşxal, barbarîya cîhadîstan.

-Cakerdişê PKKyî mîyanê lîsteya terorî de yeno a mana ke Serekê ci Abdullah Ocalan 22 serrî yo Zîndanê Îmraliyî de binê tecrîdî de yo.

-Cakerdişê PKKyî mîyanê lîsteya terorî de yeno a mana ke Fransa û Ewropa vera multecî û dezgehanê kurdan polîtîkaya krîmînalîzasyonî û teda bikerê

-Cakerdişê PKKyî mîyanê lîsteya terorî de yeno a mana ke  Paris de Sakîne Cansiz, Fîdan Dogan û Leyla Şaylemez ameyî qirkerdene.

Rejîmê Erdoganî pê leşkeranê bipereyan û cîhadîstan vera PKKyî şer keno. PKKyo ke Peymana Cenevre îmza kerda qeyî masaya muzakereyan nêrijnaye. Hukmatê Anqara semedo ke PKK lîsteya terorî de yo pê îdîaya 'endamîya PKKyî' sîyasetmedar, rojnameger, çalakîker û sivîlan tepişnena. Heman zulm Fransa de zî vera kurdan yeno kerdene.

Hêzê rojawanijî pê tewirê vera PKKyî  kurdan rê zulm kenê. Mesuldarîya pêro îmzadaran a ke goreyê Peymana Cenevre têbigêrê la Tirkîya peymane binpay kena.

Îdarekarê ercîyayeyî yê Fransa û Ewropa ma nê persan şima ra persenê:

-Eke PKK rêxistina terorî ya Fransa çira mîyanê hêzê koalîsyonî yê vera DAÎŞî de PKK û PYDyî reyde şer kerd?

-Yewîya Ewropa pê kamyew sebebî ra PKK sey 'rêxistina terorî' pênase kena?

-Şima pê kamyew ercnayîşî têkoşînê xopawitişî yê PKKyî û çalakîyanê terorî yewbînan ra seyci vînenê?

-Şima pê kamyew sebebî goreyê bira Dîwanê Edaletî yê Yewîya Ewropa tênêgêrenê? Argumanê ke PKK vist mîyanê lîsteya terorî bêbinge yê.

-Ma lîderanê Fransa û Ewropa ra wazenê ke wa polîtîkaya serebirnayîşî war verdê, peynîya zulm, bêedaletîya vera kurdan bîyarê. PKK seba meseleya kurdan û aramîya herême muxatab o.

-Lîderê Ewropa wa pê mesuldarîya xo têbigêrê û PKK lîsteya terorî ra vejê.

Têgêrayîşê Azadîye PKK 19 serrî yo mîyanê na lîsteya reşe de yo.

Morê 'PKK-Terorîst' kurdan rê heqaret o.

Seba heqê cuya haştîyane ma deyndarê kurdan ê ke PKK legal bikerê.''

Rêxistinê ke kampanya de ca gênê: Merkezê Komelê Demokratîkî yê Kurdan (NCDK), Lîgê Heqanê Merdiman (LDH), Rayraşîyayîşê Cinîyan ê Dinya (MMF), Têgêrayîşê Dostanîya bi Şaran ê vera Nîjadperestîye, Têgêrayîşê Azadîye, Partîya Antîkapîtalîste ya Newîye, Partîya Komunîste ya Fransa (PCF), Partîya Çepe û Yewîya Şaristan û Herême ya Azadî û Paştdayîşî (CGT).