Seba pêvînayîşê Îmraliyî muracat ame kerdene

Keyeyan û Avûkatanê Rayberê Şarê Kurdî Abdullah Ocalanî û yê tepişteyanê bînan ê Îmraliyî muracat kerd ke muwekîlanê xo reyde pêvînayîş bikerê.

Birayê Rayberê Şarê Kurdî Abdullah Ocalanî Mehmet Ocalan û warisê ci Mazlûm Dînçî muracatê Serdozgerîya Komare ya Bursa kerd ke mabênê tarîxanê 13-17ê nîsane de mîyanê şert û mercanê musbetan de pê telefonî û rî bi rî pêvînayîş bikerê

Keyeyanê tepişteyan ê bînan ê Îmraliyî ra birayê Omer Hayrî Konarî Alî Konarî, birayê Hamîlî Yildirimî Plat Yildirim û waya Veysî Aktaşî Melîhe Çetîn zî bi rayîrê avûkatanê xo seba pêvînayîşî muracat kerd. Ame waştene ke eke pêvînayîşo rî bi rî nêro caardene bi rayîrê telefonî pêvînayîşêk bêro kerdene.

Avûkatanê Rayberê Şarê Kurdî Abdullah Ocalanî Rêzan Sarica, Razîye Turgut, Îbrahîm Bilmez û Serbay Koklu zî muracatê Serdozgerîya Komare ya Bursa kerd ke mabênê tarîxanê 13-17ê nîsane de mîyanê şert û mercanê musbetan de pêvînayîş bikerê.