Swîsre de multecîyê ke pê vîrusê Korona kewtî erşawîyayî kampe

Kampa multecîyan a Cenevre de multecîyê ke testê înan ê Covid-19î pozîtîf vejîya tepîya erşawîyayî kampe û lapanê mergî de ameyî verdene.

Pandemîya Covid-19î Swîsre rê zî tesîrêko pîl kerd. Goreyê doneyanê Ofîsê Weşîya Şarî yê Federalî (OFSB) heta nika Swîsre de 22 hezar û 590 kesî pê vîrusê Korona kewtî, 590 kesî zî vîrusî ra merdî. Goreyê doneyanê kantonan zî hûmara nêweşan 22 hezar û 164 kesî ya û hûmara qurbanan zî 820 a.

Swîsre de vîrus tewr zêde zî tesîrê multecîyan keno. Bi hawayêkê fermîyî nêame eşkerakerdene zî yeno vatene ke xeylêk kampanê multecîyan de nêweşê Korona estê. Kampan de ke bi seyan multecîyî neçare yê ke pîya biciwîyê, selahîyetdaran heta nika tedbîrêko cidî nêgirewt. Seke merdimî kampan de lapanê mergî de ameyî verdene.

Kampa Tattesî ya şaristanê Cenevre de testê zaf kesan ê Covid-19î pozîtîf vejîya.Multecîyê ke ganî bigêrîyayêne binê karantîna verî ke bêrê weşkerdene tepîya erşawîyayî kampe. Multecîyan ANFyî reyde qisey kerd û ard ziwan ke kampe de vera vîrusê Korona tedbîrêk nêame girewtene, seba pawitişê vîrusî zî dezenfektanî nêdîyayî înan.

Kampa multecîyan de ke xeylêk blokan ra yena meydan domanî zî tede bi temamî 660 multecîyî estê.

Multecîyan ra yewe zî Mîhrîbane Temîzera kurdîstanij a ke testê aye yê vîrusê Korona pozîtîf vejîya. La herinda ke Mîhrîbane bêra weşkerdene tepîya erşawîyaye kampe.

Mîhrîbane ANFyî reyde qisey kerd û vera rewşa nêrazîbîyayîşê xo mojna. Mîhrîbane vat: ''Her çiqas vîrusî ra semed ma odaya yewkese de bimanê zî mitbax, robar û tuwalet hempar ê. Her qat de 12 kesî manenê. Ma senî eşkenê tîya de xo bipawê? Şertê ke ma tede yê bêweşîye yê û tedbîrêk nêame girewtene.''

Hetê bînî ra multecîyanê Kampa Steinî ya kantonê Aurau ANFyî rê tay fotografî erşawitî û bale ante şert û mercanê kampe. Multecîyê /a bi nameyê M.T. derheqê şert û mercanê kampe de zanayîşî dayî û ard ziwan ke kampe de bi temamî 60 kesî manenê û selahîyetdarî kampe de nîyê.

M.T. ard ziwan ke rîxmê Covid-19î ê hema zî odaya 5-6 kesan de manenê û vat: ''Kampe 3 qatan ra yena meydan, het qat de 20 kesî manenê. Robar, tuwalet û mitbax hempar ê. Seba werdiş, şimitiş û kincan hewteyêk de 63 frank danê. Vera vîrusî tedbîrêk nêame girewtene. Kampe de ne wezîfedarêkê asayîşî ne zî selahîyetdarî estê. Ma wazenê tedbîr bêro girewtene.''