'Tecrîd sîstemêkê îdarekerdişî yo ke ganî werte ra bêro wedaritene'

Avûkatanê Buroyê Huqûqî yê Asrinî ra Faîk Ozgur Erolî derheqê tecrîdê Rayberê Şarê Kurdî Abdullah Ocalanî de vat: ''Sîstemê tecrîdî yê Îmraliyî hem sîstemêkê cezakerdişî hem zî îdarekerdişî yo. Ganî bêro wedaritene.''

Tecrîdkerdişê Rayberê Şarê Kurdî Abdullah Ocalanî 21 serr ê ke dewam keno. Tecrîd asta nikayênî de hînî bi giranî yeno caardene. Avûkatanê Buroyê Huqûqî yê Asrinî ra Faîk Ozgur Erol ANF reyde qisey kerd û îfade kerd ke tecrîdo ke dewleta tirke Îmrali de keno vurîya metodêkê îdarekerdişî.

Avûkat Erolî vat: ''Formê caardişê qanûnê tîya de wextêk îdarekaranê dewlete de wina yew fikîr virazîya;'Eke ma eşkenê tîya bi nê hawayî îdare bikerî ma eşkenê nê krîzî zî bi nê hawayî îdare bikerê û netîceyê xurtî yê ci bivînê. O wext ma komel zî bi nê hawayî îdare bikerê' Û no kerd zî. Mîsal pêvînayîşê avûkatan goştarî kenê qeyd kenê.

Ocalanî par grevê vêşanîye ra dima vatbi '30-40 rojan ra dima şina anê yan zî nêanê. Eke nêarê wa kes xo seke xapîyayo hîs nêkero. No karêkê têkoşînê sîyasî yo, êyê ke wazenê têkoşînê xo yê sîyasî bikerê. La bi metodanê nikayînan ney; bi grevê vêşanîye, bi rojeyê mergî, bi xovêşnayîşî ney. Bi metodêko ke têkoşînê sîyasî û heqanê qanûnîyan ano vernî.' Tîya de meseleyêke esta; Tecrîd amebi wedaritene yan ney? Eke destûrê pêvînayîşî bêro dayene û pêvînayîşî her tim bêrê kerdene tecrîd do bêro wedaritene? Sîstemê tecrîdî yê Îmraliyî sîstemêkê cezakeridşî yo û sîstemêkê îdareyî yo. Sîstemo winasên bi pêvînayîşanê keyeyî yan zî avûkatan nêno wedaritene. Ganî sîstemê tecrîdê Îmraliyî bêro girewtene û no sîstem werte ra bêro wedaritene.

Ganî şert û mercê tecrîdkerdişê Ocalanî bi fikrêkî xurtî bêrê ercnayene. No fikir ganî bêro wedaritene: Ocalan kesêko îstîsnayî yo, coka şert û mercê îstîsnayî yê ciwîyayîşê ci zî ganî sey normal bêrê dîyene. No fikir, famkerdiş 21 serr ê ke wayîrîya sîstemê Îmraliyî keno. Meseleya bingeyîne ya Tirkîya meseleya kurdan a û heta ke na mesele çareser nêba Tirkîya demokratîk nêbena.''