Bi nameyê tepişteyanê dewaya PKK û PAJK’î Denîz Kayayî eşkerayîyêk daye. Eşkerayîye de çalakîyê Zulkuf Gezenî, Ayten Beçete, Ûgûr Şakar û Zehra Saglame ameyî bi vîrvistene û ame vatene, tepişteyî qerardar ê ke heta bicaameyîşê waştişanê înan xoverdayîşê grevê vêşanîye bidomnê.

Eşkerayîye de ame vatene, tecrîdkerdişê Rayberê Şarê Kurdî Abdullah Ocalanî ke rastîye de teşebusê seba bêîradekerdişê şaran o, Kurdistan û her cayê dinya de bi xoverdayîş ameyo pêşwazîkerdene.

Eşkerayîye de ame vatene ke xeta xoverdayîşê tarîxîyî ya ke bi serkêşîya Leyla Guvene dest pêkerde, pêl bi pêl xeylî welatan de vila bi û bale ancîyaye ke no xoverdayîş ramojneno ke felsefeya azadkerdişê cinîyan û merdimîye ya Rayberê Şarê Kurdî kewta pratîk.

Şehadetê 4 Hemrayanê Ma Bawerîya Ma Ya Bi Serkewtişî Xurtêr Kena

Eşkerayîye de ame vatene, no xoverdayîşo bianor o ke bi serkêşîya zîndanî dest pêkerd, bi xoverdayîşêkê şarî, roje bi roje beno pîl û ame vatene, “Hemrayî Zulkuf Gezen, Ayten Beçete, Ûgûr Şakar û Zehra Saglame Kurdistan, metropol û diaspora de bi çalakîyanê xo yê pîlan hemverê faşîzmê AKP-MHP’yî de vat, ‘Tarîx o yo ke bi xoverdayîşî ameyo nûştene.’

Şehadetê her çar hemrayanê ma bawerîya ma ya bi serkewtişî hîna kerde xurte, hem zî qerardarîya şarê ma hîna kerde pîle. Bêguman prosesanê wina bêhempayan de şehadet sewîyeya tewr bianor a ke ma rê manena, xoverdayîş û mucadele pê hîna beno pîl. Ercê çalakîyanê hemrayanê ma yê şehîdan ercê tewr pîl ê qîmetberz ê. Embazê ma gama ke çalakîya fedaîye viraşte, zereyê fedaîtîye de fedaîtîye kerde, seba ke vernîya şehadetanê mumkunan bigêrê û şehadetê neweyî nêvirazîyê, bi çalakîyanê xo yê hemverê tecrîdî cane xo feda kerdî. No nîyet û cesaret seba Rayberîye, partîyanê ma PKK û PAJK’î û merdimîye sebebê anorî yê.”

Bêwijdanî Sewîyeya Tewr Berze De Ya

Eşkerayîye de ame vatene, qedînayîşê tecrîdkerdişê Rayberê Şarê Kurdî Abdullah Ocalanî û binfînayîşê faşîzmî bi bicaardişê rastî û felsefeya Ocalanî virazênê û ame vatene, “Esasê partîya ma cimatbîyayîş û organizebîyayîş o. Êyê ke çalakîye de organize bîyê ê eşkenê prosesî rê bibê cewab. Bi teşebusêk bi ruhê prosesî û mucadeleyê pêroyîyî serkewtiş eşkeno bêro bi destfînayene. Faşîzmê hemverê ma faşîzmêko winayên o ke cenazayanê hemrayanê ma ra zî terseno. Bêwijdanî sewîyeya tewr berze de ya. Ma vanê, se beno wa bibo zereyê heme şert û mercan de bi xoverdayîşê pêgirewteyî ma do bi ser bikewê û azad bibê.”

‘Heta Ke Waştişê Ma Bêrê Bicaardene Do Xoverdayîşê Ma Dewam Bikero’

Nê bingeyî ser o ma keyeyanê hemrayanê xo Zulkuf, Ûgûr, Aytene û Zehra rê û şarê Kurdî rê serweşîye wazenê, reyna qehremanîya hemrayanê ke xover danê silam kenê û soz danê ke fikrê ‘pîya bi hawayêkê organîzekerdeyî biewnîrê cuye ra’ xo rê esas bigêrê. Bêguman serkewtiş do yê hemrayan û şarê ma yê xoverdayoxî bibo.

Bi nameyê tepişteyanê doza PKK û PAJK’î ma şehîdanê hemleya xo ya xoverdayîşî ke hewteyê qehremanîye de tewrê qehremanan bîyî bi rêz û minet bi vîr anê û sozê xo tekrar kenê ke ma do mucadeleyê înan hîna bikerê pîl. Bi 7 hezarî kesanê ke tewrê grevê vêşanîye yê bêdem û bêagêrayîşî bîyê heta waştişê ma nêrê ca ma do çalakîya xo bidomnê. Seba raşanayîşê faşîzmê AKP-MHP’yî û afernayîşê şert û mercanê azadan ê rayberîye, ma do xeta xo ya xoverdayîşî ya dorê rayberê xo xurt bikerê.”

Peynîya eşkerayîye de veng dîya şarî, sazîyan û rayapêroyîye ya dinya û Tirkîya ke bi mesuldarî tê bigêrê.