Meclîsê Asayîşê Karî û Weşîya Karkeran (ÎSÎG) derheqê cînayetanê karî yê menga teşrîna peyêne û menganê bînan ê 11î de raporê xo eşkera kerd.

Goreyê raporî menga teşrîna peyêne de tewr tay 126 karkerî wefat kerd û tewr zaf şaristanê Îstanbulî de cînayetê karî ameyî meydan. Rapor de mergê karkeran sey ''cînayetê polîtîkî'' ameyî namekerdene.

ÎSÎGî raporê xo de pare kerd ke 6 serranê peyênan de bêkarîye û rewşa xebata girane ra 351 karkeran xo kişt û vat: "Semedo tewr girîngî yê xokiştişan zorîya debarî yo. Semedê zehmetîya debarî ra dewrê AKPyî de na hûmare bîye zêde û mabênê serranê 2002 û 2018î de 4 hezar 481 kesan xo kişt."

Menga çeleyî de 159 tewr tay karkerî, menga sibate de tewr tay 127 karkerî, menga adare de tewr tay 144 karkerî, menga nîsane de tewr tay 178 karkerî, menga gulane de tewr tay 164 karkerî, menga hezîrane de tewr tay 131 karkerî, menga temmuze de tewr tay 178 karkerî, menga tebaxe de tewr tay 149 karkerî, menga êlule de 147 tewr tay karkerî, menga teşrîna verêne de tewr tay 158 karkerî û menga teşrîna peyêne de tewr tay 126 karkerî cînayetanê karî ra merdî.

Goreyê raporê ÎSÎGî serra 2012î ra heta nika bînaçoya cînayetanê karî wina ya: serra 2018î de 1923 kesî, 2017 de 2006 karkerî, 2016 de 1970 karkerî, 2015 de 1730 karkerî, 2014 de 1886 karkerî, 2013 de 1235 karkerî û 2012 de 878 karkerî merdî.