Meclîsê Şarî yê Mexmûrî: Merganê şikdaran ra PDK berpirsîyar o

Meclîsê Şarê Demokratîkî yê Kampa Multecîyan a Mexmûrî da zayene ke di roniştoxê kampe wexto ke ameyî tepiştene bi hewayêkê şikdarî dinyaya xo bedilnaye û vat berpirsîyarê nê mergan PDK yo.

Meclîsê Şarê Demokratîkî yê Kampa Multecîyan a Mexmûrî derheqê mergê şikdarî yê Metîn Adugît û Hecî Heyder Derhinî de eşkerayîya çapemenîye daye.

Meclîsî mergê ke yew zîndan de yew zî nezaret de qewimîya şermezar kerdî nê û nê vat: ''Demo peyên de cinîyê ciwanî zî tede bi desan karker û wendekarî hetê PDKyî ra ameyî destbenkderdene û tepiştene. Di mengî verê cu Hecî Heyder Derhinî bado ke 54 rojî zîndan de mend, hela ke rewşa weşîya ci bîye girane ame veradayene. Verî ke ame tepiştene weş û war bi. Badi veradayîşî hewteyêk ravêrt nişka nêweş kewt û merd. Goreyê vatişê Heci Heyderî yê verê mergê ci û doktoran  verî ke bêro veradayene zîndan de axû dîyayo ey.

Reyna hemwelatîyê ma Metîn Adugît zî 7ê teşrîna peyêne ya 2020î de Hewlêr de hetê asayîşê PDKyî ra ame destbendkerdene. Hîrê rojî dima ra 10ê teşrîna peyêne ya 2020î de bi hewayêkê şikdarî netîceya krîzê qelbî de dinyaya xo bedilnaye. Xebera mergê ci zî badê di mengan dîyaye keyeyê ci. Na bêwîjdanîye, bêehleqîye ya. Eynî wextî no semedê  Komîsyonê Hewanê Merdiman ê Palamentoyê Kurdîstanî, rêxistinanê heqanê merdiman û Neteweyê Yewbîyayeyî  zî şerm o. Berpirsîyarê nê mergan PDK bo zî barey nê rêxistinanê bînan zî tede esto. Ganî cipêrsayîşêko zelal bero kerdene û berpirsîyarî bêrê hukmkerdene. Rena NY û hêzê herême ganî şirê PDKyî ser ke wa zextê vera roniştoxanê kampe vindarno.''