QSDyî kayo ke Hesekê de ame kaykerdene pûç vet

Şerwananê QSDyî bi xoverdayîşê xurtî cewab da hêrişê orgazîkerdeyî yê DAÎŞ û dewleta tirke. Operasyonê Hesekê de çemberê dormeyê DAÎŞî bi teng.

Çeteyanê DAÎŞî 20ê çeleyî de taxa Xiwêranî ya Hesekê de vera Zîndanê Sinaa yo ke 5 hezarî ra zafêr tepişteyî tede yê kerd. Vera nê hêrişî operasyonê QSDyî ke dîya destpêkerdene dewam keno.

Hêrişo ke pê 200 çeteyanê ke Serêkanîyê û Girê Sipî  yê ke binê îşxalê dewleta tirke de yê û bajarê Ramadî yê Iraqî ra ameyî berdenê Hesekê ame kerdene, zafê ci hetê QSDyî ra pûç ame vetene. Hêrişo organîzekerde yo ke DAÎŞ Hesekê de dewleta tirke vakurî kerd, hetê şerwananê QSDyî ra hem Hesekê û  hem zî xeta Eyn Îsa û Til Temirî de bi xoverdayîşê xurtî zafê ci ame pûçkerdene. Hêzanê QSDyî û Asayîşî hela verên a hêrişî ra dormeyê zîndanî girewt û destur nêda tepişteyê ke zafê înan xerîb ê çeteyê DAÎŞî yê biremê. Çembero bînî zî taxanê Xiwêran û Heyî Zihûrî de ame ronayene ke çeteyê hêrişkarê ke teberî ra yenê verê înan bêro girewtene. Vera grûbanê çeteyan operasyonê nûqta dîyayî destpêkerdene.

Şerwananê QSDyî operasyonê 6 rojan ê Hesekê de 550 çeteyê DAÎŞî teslîm girewtî û xeylêk çeteyî zî ameyî kiştene. Seba ke zirar mereso çeteyanê ke serrê înan binê 18î de yê QSDyî operasyon zaf baldar rayra berd û destur nêda hêrişê bireso qismê nê tepişteyan. Nê domanê ke DAÎŞ înan sey (ameyoxê xîlafetî) name keno zîndan de Îdareyê Zîndanê Sinaa semedê înan merkezo cîya yê rehabîlîtasyonî akerdbi. Hetê bînî ra personelo ke hetê çeteyan ra amebi rehîngirewtene bi operasyonê taybetî ame xelisnayene. 24 û 25ê çeleyî de pêro pîya 32 personelî ameyî xelisnayene. 

Verî Fatulteya Îktîsatî ke çeteyan xo tede nimit ame pakkerdene û vizêr zî 8 banê zîndanê neweyî û yew banê îdareyî kewtî destê şerwananê QSDyî. Seba ke hîrê banê bînî yê ke çeteyî tede bigêrê binê kontrolî xebatî dewam kenê. QSD têdima semedê teslîmbîyayîşî veng dano çeteyan ke wa merg nêqewimîyo. Hetê bînî ra tedawîyê çeteyanê ke ameyî teslîmgirewtene dewam kenê. Rixmê heme wehşetê çeteyanê DAÎŞî QSD bi tewirê ehleqî û merdimî nizdîyê înan beno û goreyê Pêkerdişê Huqûqê Şerî yê Cenevre operasyonêkî rayra beno.