Vera Jîyargeyê Munzur Babayî hêrişo nîjadperest

Qezaya Qisle ya Dêrsimî de Jîyargeyê Munzur Babayî de ke bawerîya elewîyan de sey cayê fîrazî yeno qebulkerdene kerrayan ser o nameyê MHPyî ame nuştene û sembolê nîjadperestan ê tirkan ameyî xêzkerdene.

Qezaya Qisle ya Dêrsimî de Jîyargeyê Munzur Babayî de ke bawerîya elewîyan de sey cayê fîrazî yeno qebulkerdene kerrayan ser o nameyê MHPyî ame nuştene û sembolê nîjadperestan ê tirkan ameyî xêzkerdene. Şarê Dêrsimî vera babetî nêrazîbîyayîşê xo mojna. Serekê Cemxaneyê Duzgun Babayî Alî Kirmiziçîçek û şarê Dêrsimî bale ante ser ke hêriş serrgêra Qirkerdişê Sêwasî (Madimak) de ame kerdene.

Fatma Karaya ke qezaya Gêxî ya Çewlîgî ra seba zîyaret ameya Duzgun Baba ard ziwan ke ganî her kes hûrmetê bawerîyan û fîrazîyan bikero û vat: ''Bi serran o ke hêrişê bawerîya ma kenê.''

Hemwelatî Hakki Karadagî zî îfade kerd ke hêriş serrgêra Qirkerdişê Sêwasî de ame kerdene û tesadufî nîyo. Karadagî vat: ''Ez nê hêrişî şermezar kena. Ma do rayîr û bawerîya xo teqîb bikerê. Ma do nêrverdê ke ê rayna çîyê winasênî bikerê.''

Serekê Cemxaneyê Duzgun Babayî Alî Kirmiziçîçekî vist vîrî ke bawerîya elewîyan de Munzur Baba cayo girîng gêno û vat: ''Ma nê hêrişî qebul nêkenê. Ma hîşmendîya nê hêrişî Mereş, Qoşgirî, Dêrsim, Sêwas û Çorumî ra nata şinasnenê. Ma dezgehanê xo reyde qisey bikerê û gerreyê nê hêrişî bikerê.''

Hemwelatî Velî Yildizî zî vat: ''Wazenê ke ma bitersnê. Vejîyenê cor kerrayan erzenê cemxaneyê ma yê neweyî ser, wazenê cemxaneyê ma birijnê.''