Çewlîg de Korona ra mergo verên qewimîya

Camêrdo ke testê ci yê vîrusê Korona pozîtîf vejîyabi û Nêweşxaneyê Dewlete yê Çewlîgî de mendêne dinyaya xo bedilnaye.

Çewlîg de reya verêne vizêr şan kesêkî vîrusê Korona ra dinyaya xo bedilnaye. 

Goreyê zanayîşanê  ke ameyî girewtene camêrdo 72 serre A.G. yo ke nêweşê KOAHî bi, wextêkî ra verî semedê nêweşîya xo şibi Nêweşxaneyê Dewlete yê Çewlîgî û bi şikê vîrusê Korona gêrîyabi binê karantîna. A.G. yo ke testê ci yê vîrusî pozîtîf vejîyabi vizêr şan nêweşxane de dinyaya xo bedilnaye.

Nê mergê verênî yê vîrusê Korona ra dima Çewlîg de krîzê 'gassalî' zî vejîya werte. Seba ke nêweşxane de gassal çinbi û gassalanê şaredarîye zî tersa ke cenaza bişuwê alozîye qewimîyaye. Dima tedbîran reyde cenaza ameye şutene. Ame zanayene ke cinîya A.Gyî zî nêweşxane de binê karantîna de ya.

Cenazaya A.Gyî dewa Madrakî ya Çewlîgî de ameye definkerdene û ame zanayene ke semedê janî ra şîn do nêro ronayene.

Çewlîg de heta nika 4 nêweşê janê vîrusê Korona bîyî weş. Goreyê doneyan ê nêfermîyan şaristan de 20 nêweşê bivîrusî estê û hûmara kesanê ke binê karantîna de yê zêdîyena.