14ê hezîrana 2018î de qezaya Pirsûsî ya Riha de merdim û pawitoxanê wekîlê AKPyî Îbrahîm Halîl Yildizî hêrişê dikana keyeyê Şenyaşarî kerdbi û hêriş de Haci Esvet Şenyaşar û lajê ey Celal û Adil Şenyaşar, birayê Yildizî Mehmet Şah Yildiz kişîyayî. Roniştişê 2. yê dewa Mehkemeya Cezaya Girane ya Meletî de ame kerdene. Avûkatanê Yildizî xîret kerd ke dewa provake bikerê. Fadil Şenyaşaro ke 2 serrî yo ke zîndan de yo, pawitişê xo de da zanayene ke o Mehmet Şah Yildiz nêkişto.

Destûr nêame dayene ke wekîlê HDPyî Ayşe Surucu û Omer Faruk Gergerlîoglu dekewê bînaya mehkeme. Roniştiş e hêverî versûc û gerrekeran pawitiş kerd.

Cinîy Celal Şenyaşarî Hûrîye Şenyaşar destpêk de pawitiş kerd û vat: ''Wexto ke ez şîya nêweşxane mi dî ke mêrdeyê mi Celal birîndar bîyo. Celal ez dîya û destê xo mi rê derg kerdî. Dima o ame berdene bi oda. Dima zî mi dî ke oda ra kesêko ke îşligê ci yo sipî gonî de mend, ame teber. Înan mêrdeyê mi kişt.''

Dima Mehmet Şenyaşarî şahîdîya xo arde ziwan û vat: ''Wexto ke ez şîya dikan di birayê mi birîndar bibî. Mi rê hetkarîye waşte. Ambulans erey ame. Ez birayê xo Adilî reyde şîya nêweşxane. Dima wexto ke ma ambulansî ra peya bîyî guleyî varnayî birayê mi ser û o qetil kerd.''

Ferît Şenyaşaro ke serebûtî de birîndar bibi vat: ''Destpêk de cayê karî de înan wekîlî rê vat ke 'ma do dersê bidê nînan.' Dima mi rê telefon ame. Wexto ke ez şîya cayê serebûtî ê serê birayê mi de bîyî. Destê mi de ço kolî estbî. Mi da înan ro ke serê birayê mi ra wurzê. O çax înan hêrişê mi kerd. Hende da mi ro ke ez xo ra şîya.''

Emîne Şenyaşara ke mêrde û 2 lajê aye kişîyayî derheqê serebûtî de nê çîyî vatî: ''Ê ma bi îdîaya rêxistine sûcdar kenê. Eke wina yo çira kîracîyê mi polîs û leşker ê. Tornê mi xebera hêrişî daye mi. Ez şîya ver bi dikane. Cîrananê mi nêverda ez şora vatêne lajê mi kişîyayê. Vatêne 'meşo to zî kişenê.' Polîsan dormeyê dikane girewtbi, nêverda ez şora. Dima ez pê wesayîtêkî şîya nêweşxane. o çax mi dî ke mêrdeyî mi her cayê xo ra kard bîyo. Verê çimanê mi de nêweşxane de Haci kişîya. Mi firsend nêdî ke domananê xo bivîna.'' Emîne Şenyaşar wexto ke pawitişê xo kerdêne bermayêne.

Fadil Şenyaşaro ke Zîndanê Xarpêtî de tepişte yo pê rayîrê SEGBÎSî tewrê mehkeme bi, nê çîyî vatî: ''Wextê weçînayîşî bi. Îbrahîm Halîl Yildiz û tede tay kesî ameyî dikana mi. Mi a heke wekîlî rê vat merdimê ci dizdî kenê. Mi vat wa hêverî a mesele çareser bikero. Wekîlî mi rê vat: 'Senî to mi rê wina vanî.' Dima ê şîyî dikana ma ya bîne. Mi rê telefon ame û vatêne birayanê mi rê hêriş ame kerdene. Ez û birayê mi Ferît ma şîyî. Destê mi de çeke, destê Ferîtî de zî kolî estbî. Wexto ke mi dîmenê dikane dîyî doxa mi şîye û mi 3 rey guleyî eştî. La mi kes hedef nêkerd. Îdîaname de vanê 8 la mi 3 guleyî eştî. Dima merdimanê Yildizî hêrişê mi kerd. Çeka mi mi destî ra girewte. Mi qet Mehmet Şah Yildiz nêkişt. Ez wazena bêra veradayene.''

Îbrahîm Halîl Yildiz sey muştekî ame goştarîkerdene. Yildizî îdîa kerd ke seba ke o teregfîrê AKPyî yo ci rê komplo ameye kerdene. Avûkatanê Yildizî zî xîret kerd ke keyeyê Şenyaşar û mehkeme provake bikerê.

Yildiz û avûkatan waşt ke mabênê Haci Esvet Şenyaşar û ''rêxistine'' de têkilîyêke ronê la serekê mehkeme vera naye tewirê xo mojna û vat: ''Ma tîya de merdimo ke ameyo kiştene hukm nêkenê.'' 

Mehkeme mabên da roniştiş. Roniştiş do pê beyananê versûc Enver Yildizî dewam bikero.