Hunermendanê kurdan: Ma do seba Barişî vajê

Bariş Çakan Anqara de seba ke muzîkê kurdkî goştarî kerdêne kişîyabi. Hunermendanê kurdan vera qetilkerdişê Bariş Çakanî nêrazîbîyayîşê xo mojna û vat: ''Ma do seba Barişî vajê.''

Şewa 31ê gulane seate 22:30 de Anqara de ciwanê bi nameyê Bariş Çakanî (20) seba ke muzîkê kurdkî goştarî kerdêne ame qetilkerdene. Hunermendê kurdî vera nê hêrişê nîjadperestî weriştî payan ser û înan îfade kerd ke ê do seba Barişî deyîranê xo vajê.

Hozan Kawa: ''Rayber û lîderê ma bi serran o ke zîndan de binê tecrîdî de yê. Tirkîya de bedelê fikran ê azadan giran o. Bariş Çakan wexto ke heqê xo yo tewr meşrû xebitnayêne, muzîk goştarî kerdêne ame kiştene. Tirkîya de merdimî ewro seba ziwanê xo yenê qetilkerdene. Ma sey hunermendan nê serebûtî şermezar kenê û ma vanê ke ma deyîranê xo seba Bariş û haştîye do vajê.

Azad Bedran: Ez verê vîrameyîşê Barişî de sereyê xo ana war. No serebût raştîya dewleta tirke ya.  Tirkîya de nîjadperestîye resaya asta tewr berze. Ganî şarê kurdî, hunermend, roşnvîr, nuştox û rojnamegerî nê serûbûtî mîyan mekerê. Anqara de welat, muzîk û kulturê ma ameyî qetilkerdene. Nika ra pey ez do pêro deyîranê xo dîyarîya Barişî bikera û seba Barişî vaja.

Mesûd Gever: ''Nê welatî de ziwan û deyîran ra semed merdîmî yenê kiştene. Sebebê nê hêrsî çî yo? No serebût rîyê dewlete yo. Rojêke ma welatê xo de bi hawayêkê azadî deyîranê xo do vajê. Deyîrê ma pêro seba Barişî yê û ma tim do pê ziwanê xo qisey bikerê. Zulm û zorbazîye nêeşkenê ma ziwanê xo ra dûrî bivisnê.''

Hunermend Seyîtxan: ''Her roje şarê kurdî yeno destbendkerdene, tepiştene, kiştene. Îqtîdarê faşîstî yê AKP-MHPyî qirkerdişê kurdan kerd armanc. Wazenê bi nê hawayî mesaj bidê kurdan. Seba ke ma heqê Barişan bipawê û qesasê Barişan bigêrê ma do wayîrê estbîyayîşê xo bivejîyê û ma dormeyê destkewteyanê xo de bibê yew. Eke ma yewîya xo awan nêkerê zêdêr ciwanê kurdî do bibê hedefê hêrişan ê faşîstan.''