Karayilan: Zînî Wertê meseleya pêro kurdan a

Endamê Komîteya Rayberdişî ya PKKyî Murat Karayilanî pare kerd ke rewşa Zînî Wertê têna serebûtêkê mabênê PDK û PKKyî de nîya û vat: ''Eke planêkê PDKyî çinêbo ganî seba apeynêantişî hende israr nêkero.''

Beşê diyînî yê roportajê xo de Endamê Komîteya Rayberdişî ya PKKyî Murat Karayilanî derheqê Zînî Wertê û çalakîyanê gerîlayan de qisey kerd.

Qiseykerdişê Karayilanî ra beşêk wina yo:

''Heqê kurdan çin o ke qederê xo biweçînê, dewleta xo awan bikerê.  Ganî ma yewîya xo bîyarê ca. Eke yewîya ma nêba ma bêca û bêwar manenê. Dewleta tirke estbîyayîşê kurdan seba xo tehluke vînena. Seba ci têna PKK nê PDK û YNK zî tehlukeyêk o. Dewleta tirke wazena Başûrê Kurdîstanî zî daxîlê sînoranê xo yê Mîsak-i Mîllî bikera la Başûr naye nêvîneno ke no mi rê zaf eceb yeno. Dewleta tirke Agirî de, Dêrsim de serewedaritişê Şêx Seîdî de kurdî qir kerdî. Nika zî Efrîn de kurdan qir kena. Wazena demografîya Efrînî bivurna. Nika ma na çarçewe de biewnê Zînî Wertê. Na mesele têna mabênê PDK û PKKyî de nê, mabênê PDK û YNKyî de zî ya. Yanî pêro her kes eleqeder kena. Pêro rayaumûmîye wazena ke mabênê kurdan de alozîyêke nêqewimîye û coka vera eşkerayîyan pare kenê. Sîyasetê PDKyî yê Zînî Wertê û Mexmûrî raşta zî nêkeweno mi sere. No sîyasetê înan do ser nêkewo. Ma hêvî kenê ke înat û israrê seba na mesele ra fek bêro veradayene. 

Eke PDK xo Zînî Wertê ra bianca xora mesele tay nerm bena la babete têna Zînî Wertê nîya. Uja de 3 embazê ma şehîd bîyî. Eke ez bîyêne mi nêverdêne pêşmergeyî bibê hedef. Rûmetêkê leşkerî û fermandarîye zî esto. Hukmatê Başûrê Kurdîstanî seba ke verê ajanîye bigêrê tedbîran nêgeno. MÎT Başûrê Kurdîstanî de rehet têgêreno. Dewleta tirke wazena ke Başûr de pê şik û fîtneyan Başûr de serdestîya xo rone. Dewleta tirke wazena bi nê hawayî ser bikewa. Par zî embazê ma Cemîl û Demhat Başûr de şehîd kerdî. Amedîyê de hêrişê dewan kerd çunke wazena ke fîtne bikera û mabênê ma de nakokîye xorin bikera. Berê Herêma Başûrî MÎTî rê akerde yo. Coka MÎT wazeno herême îstîsmar bikero. Eke verê naye nêro girewtene herême pêro seba îstîsmar û kayanê dişmenan do akerde biba. Ganî ma pêro terefê kurdî na mesele pîya çareser bikerê. 


Keştîya ma yew a, ma pêro girêdayîyê yewbînan ê. Çunke ma neteweyêk ê. Rayber Apoyî pêvînayîşê xo yê telefonî de ard ziwan ke ganî şerê zereyî nêqewimîyo, yewîya kurdan bêra caardene. No perspektîfê ma yo. Ma pêro hêzêk ê. Meseleyê ma yê zereyî zî estbê ganî ma pîya nînan çareser bikerê. Ma seba naye amade yê ke çi hewce yo bikerê. 

Ma Şingal, Dûhok, Laleş, Hewlêr, Mexmûrî pawitî, ma seba ci şer kerd. Ma domanê nê şarî yê, ma do menfaatanê nê şerî xora bipawê. La heyf o ke mîyanê komelî de merdimê xirabî estê, şarê ma ra yeno waştene ke wa ajanîye bikero. Ganî şarê ma, şarê Başûrê Kurdîstanî destûr nêdê naye. Ganî ê wayîrê gerîlayan bivejîyê. Fermandar Têkoşîn Geverî hetê ajanan ra ame îxbarkerdene û wesayîtêk de 2 embazanê xo reyde kişîya ke ey Mexmûr de şer kerd, şarê Mexmûrî pawit. Ma hêvî kenê ke şarê ma vera ajanîye do bibo wayîrê tewirêkî. 

Ma wazena serrgêra 17. ya Hemleya 1ê Hezîrane xurtêr pêşwazî bikerê. Di serranê peyênan de ma bi taybetî metodanê şerî ser o vindenê. Ma wazenê gerîlayî vera teknolojî, îstîxbarat û şerê psîkolojîkî bieşkê ser bikewê. Ma seba naye amadekarîya xo kerde û ma tira bawer ê. Ma çalakîyanê xo yê ke heta nika kerdî zî seba destpêkî hol, serkewte vînenê. Ma do serra 2020î bikerê serrêka newîye, serrêka xoverdayîşî. La ganî şarê ma yo rûmetên vera ajanîye tewirê xo bimojno. Ganî her kes vera ajanan keye, dew, şaristanê xo bipawo û ma bibê yew. Ma pê bawer ê ke rayraşîyayîşê Rayber Apoyî û azadkerdişê Kurdîstanî de serra 2020î do biba serra xoverdayîşî. ''